চিকিৎসা খণ্ডক চৰকাৰে অগ্ৰাধিকাৰ নিদিয়াটো এক জৰুৰী চিন্তাৰ বিষয়: মুখ্য ন্যায়াধীশ ৰামান্না

দেশৰ মুখ্য ন্যায়াধীশ এন ভি ৰামান্নাই বৃহস্পতিবাৰে কয় ‘’চৰকাৰে চিকিৎসা খণ্ডক অগ্ৰাধিকাৰ নিদিয়াটো’’এটা ‘’জৰুৰী চিন্তাৰ বিষয়’’।

তেওঁ লগতে প্ৰশ্ন কৰে ‘’আন কাৰোবাৰ ব্যৰ্থতাৰ বাবে চিকিৎসা বৃত্তিধাৰীসকল কিয় বলি হ’ব?’’

‘’চিকিৎসা সংস্থা তথা চৰকাৰৰ সংশ্লিষ্ট এজেন্সীসমূহে একেলগ হৈ এই  সমস্যাসমূহ মোকাবিলা কৰিব লাগিব। তেতিয়াহে প্ৰতিবছৰে পহিলা জুলাইৰ দিনা চিকিৎসকসকলক প্ৰকৃততে অভিনন্দন জনাব পাৰিম,’’-বিশ্ব চিকিৎসক দিৱসৰ এক অনুষ্ঠানত ভাষণ দি মুখ্য ন্যায়াধীশগৰাকীয়ে এইদৰে কয়।

তেওঁ লগতে হায়দৰাবাদস্থিত এটা ছচাইটিৰ ডায়েবেটিছৰ বিৰুদ্ধে আৰম্ভ কৰা এক অভিযানো মুকলি কৰে।

‘’এইটো দুৰ্ভাগ্যজনক যে আমাৰ চিকিৎসকসকলক কৰ্তব্যৰ সময়ত নিৰ্মমভাৱে আক্ৰমণ কৰা হৈছে। আন কাৰোবাৰ ব্যৰ্থতাৰ বাবে কিয় চিকিৎসা বৃত্তিধাৰীসকল বলি হ’ব,’’-মুখ্য ন্যায়াধীশ ৰামান্নাই কয়।

মুখ্য ন্যায়াধীশগৰাকীয়ে স্পষ্ট কৰি কয়,’’পৰ্যাপ্ত সংখ্যক চিকিৎসা বৃত্তিধাৰীৰ অভাৱ, আন্ত:গাঁথনি, ঔষধ, পুৰণিকলীয়া প্ৰযুক্তি তথা চিকিৎসা খণ্ডক চৰকাৰে অগ্ৰাধিকাৰ নিদিয়া আদি জৰুৰী চিন্তাৰ বিষয়। এইটো সত্য যে ফেমিলি ডক্টৰৰ পৰম্পৰা নাইকীয়া হৈছে। কিয় কৰ্পোৰেট তথা বিনিয়োগকাৰীয়ে কৰা লাভৰ বাবে চিকিৎসকলক দোষাৰোপ কৰা হৈছে?’’