মুখ্যমন্ত্ৰী বীৰেন সিঙে জনালে, ‘মণিপুৰৰ হিংসাত ৬০ জন লোকে হেৰুৱাইছে প্ৰাণ, জ্বলিছে ১৭০০ ঘৰ!’

মণিপুৰৰ মুখ্যমন্ত্ৰী এন বীৰেন সিঙে ৰাজ্যখনৰ হিংসাত্মক ঘটনা সন্দৰ্ভত মুখ খুলিছে। যোৱা বুধবাৰৰ পৰা উত্তৰ-পূৰ্বাঞ্চলৰ ৰাজ্যখনত হিংসাই জোকাৰি গৈছে। ৰাজ্যৰ এটা অংশত সান্ধ্য আইন আৰোপ কৰাৰ পৰা আৰম্ভ কৰি ইণ্টাৰনেট সেৱা বন্ধ কৰালৈকে চৰকাৰে বিভিন্ন পদক্ষেপ ল’ব লগা হৈছে।

এই পৰিবেশৰ মাজতে মুখ্যমন্ত্রীয়ে প্রথমবাৰৰ বাবে ৰাজহুৱাভাৱে ৰাজ্যখনৰ হিংসাত্মক পৰিস্থিতিৰ বিষয়ে মুখ খুলিলে৷ তেওঁ ৰাইজক শান্তি-সম্প্ৰীতি বজাই ৰাখিবলৈ আহ্বান জনায়।

মুখ্যমন্ত্ৰীয়ে কয় যে যোৱা কেইদিনমানত মণিপুৰত ৬০ জন লোক হিংসাত্মক ঘটনাৰ বলি হৈছে। ইয়াৰ বাহিৰেও বহু লোক আহত হয়। বহু লোকৰ ঘৰ জ্বলিছে। এই পৰিস্থিতিৰ বাবে যিসকল দায়ী তেওঁলোকক ৰেহাই দিয়া নহ’ব বুলিও মুখ্যমন্ত্ৰীয়ে কয়। কঠোৰ শাস্তিৰ সন্মুখীন হ’ব লাগিব বুলিও সকীয়াই দিয়ে।

লগতে পঢ়ক: আমেৰিকাৰ শ্বপিংমলৰ নিৰ্বিচাৰ গুলীচালনাত মৃত্যু ভাৰতীয় যুৱতী অভিযন্তাৰ; শোকস্তব্ধ পৰিয়াল

মণিপুৰৰ চুৰাচান্দপুৰত যোৱা বুধবাৰে হিংসাত্মক পৰিস্থিতিৰ সৃষ্টি হয়। এই ৰাজ্যৰ সৰহসংখ্যক জনসংখ্যা মেইটেই সম্প্ৰদায়ৰ। দীৰ্ঘদিন ধৰি অনুসূচিত জনজাতি (এছ টি)ৰ মৰ্যাদাৰ বাবে আন্দোলন কৰি আহিছে। এই দাবীৰ বিৰোধিতা কৰি বুধবাৰে মণিপুৰী ছাত্ৰ সংগঠন ‘অল ট্ৰাইবেল ষ্টুডেন্টছ ইউনিয়ন অৱ মণিপুৰ’ চমুকৈ আটছুমে এক শোভাযাত্ৰা উলিয়ায়। তাৰ পৰাই আৰম্ভ হয় সংঘাত আৰু সেয়া পিছত বৃদ্ধি পায়।

সেইদিনাৰ পৰাই মুখ্যমন্ত্রী বীৰেন সিঙে কেইবাটাও টুইটৰ জৰিয়তে ৰাজ্যৰ আইন-শৃংখলাৰ পৰিস্থিতি সন্দর্ভত বিভিন্ন নির্দেশনা দিছে৷ অৱশ্যে সোমবাৰে প্ৰথম ৰাজহুৱাভাৱে মুখ খুলিছে। তেওঁ কয়, ‘’এই হিংসাত এতিয়ালৈকে ৬০ জন লোকে প্ৰাণ হেৰুৱাইছে। আহত হৈছে ২৩১জন লোক। ইয়াৰ বাহিৰেও কমেও ১৭০০ ঘৰ জ্বলি গৈছে। ৰাজ্যবাসীক শান্তি বজাই ৰাখিবলৈ আহ্বান জনাইছোঁ।”

মুখ্যমন্ত্ৰীয়ে লগতে কয়, “মণিপুৰৰ বিভিন্ন প্ৰান্তত গৃহহীন আৰু সিঁচৰতি হৈ থকা সকলোকে চৰকাৰে সহায় কৰি আছে। তেওঁলোকক নিৰাপদ স্থানলৈ লৈ যোৱা হৈছে। এই পৰ্যন্ত ২০ হাজাৰ লোকক নিৰাপদ আশ্ৰয়স্থললৈ প্ৰেৰণ কৰা হৈছে। আৰু ১০ হাজাৰ লোক গৃহহীন হৈ আছে।”

লগতে পঢ়ক: মন্ত্ৰী অশোক সিংঘলৰ পৰিয়ালৰ মালিকানাধীন প্ৰটেক গ্ৰুপৰ সুউচ্চ অট্টালিকাৰ নিৰ্মাণ অবৈধ: আপ

এই পৰিস্থিতিৰ বাবে দায়ীসকলক চিনাক্ত কৰিবলৈ উচ্চ পৰ্যায়ৰ তদন্ত কৰা হ’ব বুলি জানিবলৈ দিছে মুখ্যমন্ত্ৰীয়ে। কেৱল সেয়াই নহয়, পৰিস্থিতি চম্ভালিব নোৱাৰা আৰু কৰ্তব্য পালনত ব্যৰ্থ হোৱা চৰকাৰী আৰু প্ৰশাসনিক বিষয়াসকলকো কঠোৰ শাস্তি প্ৰদান কৰা হ’ব বুলিও তেওঁ কয়। একে সময়তে ৰাজ্যবাসীক ভুৱা বাতৰি আৰু উৰাবাতৰি প্ৰচাৰ নকৰিবলৈ তেওঁ আহ্বান জনায়।