অক্সিজেন এক্সপ্ৰেছত ৰাজ্যলৈ অহা ৮০ মেট্ৰিক টন তৰল মেডিকেল অক্সিজেন গ্ৰহণ কৰিলে মুখ্যমন্ত্ৰীয়ে
ৰাজ্যখনৰ কোভিড আক্ৰান্তৰ ৰোগীৰ বাবে সকাহ প্ৰদান কৰি অসমত আহি উপস্থিত হ’ল অক্সিজেন এক্সপ্ৰেছ।
জামেছদপুৰৰ পৰা ৮০ মেট্ৰিক টন তৰল মেডিকেল অক্সিজেন কঢ়িয়াই অক্সিজেন এক্সপ্ৰেছ দেওবাৰে দিনৰ ১২ বজাত আহি আমিনগাওঁৰ ইনলেণ্ড কন্টেইনাৰ ডিপ’ত উপস্থিত হয়।
চাৰিটা ডবাত এই ৮০মেট্ৰিক টন তৰল মেডিকেল অক্সিজেন লৈ উপস্থিত হোৱা অক্সিজেন এক্সপ্ৰেছৰ পৰা অক্সিজেনখিনি মুখ্যমন্ত্ৰী হিমন্ত বিশ্ব শৰ্মাই নিজেউ উপস্থিত থাকি আনুষ্ঠানিকভাৱে গ্ৰহণ কৰে।
অক্সিজেন এক্সপ্ৰেছক আদৰণি জনাই মুখ্যমন্ত্ৰী হিমন্ত বিশ্ব শৰ্মাই কয় যে প্ৰতি সপ্তাহত দুবাৰকৈ এই অক্সিজেন এক্সপ্ৰেছ অসমলৈ আহিব। এইদৰে নিয়মীয়াকৈ অক্সিজেন অহাৰ পাছত ৰাজ্যত অক্সিজেনৰ নাটনি দূৰ হ’ব।
মুখ্যমন্ত্ৰীগৰাকীয়ে লগতে জানিবলৈ দিয়ে যে ইয়াৰে ৰাহি হোৱা অক্সিজেন উত্তৰ-পূবৰ আন ৰাজ্যলৈয়ো প্ৰেৰণ কৰা হ’ব।
মাননীয় প্ৰধানমন্ত্ৰী @narendramodi ডাঙৰীয়াৰ ওচৰত আমি কৃতজ্ঞ!#অক্সিজেনএক্সপ্ৰেছ-ৰ দ্বাৰা ৮০ মেট্ৰিকটন মেডিকেল #অক্সিজেন অসমলৈ প্ৰেৰণ কৰাৰ বাবে ৰাজ্যবাসীৰ হৈ ভাৰত চৰকাৰক ধন্যবাদ জনাইছোঁ ।
এই কঠিন সময়ত ই আমাৰ মনোবল আৰু অক্সিজেনৰ সামৰ্থ্য বৃদ্ধি কৰিছে।@PMOIndia @PiyushGoyal pic.twitter.com/V19TijP9d7
— Himanta Biswa Sarma (@himantabiswa) May 23, 2021
আনহাতে, ৰাজ্যখনত বৰ্তমান প্ৰতিদিনে প্ৰয়োজন হোৱা ৭০ মেটিক টন অক্সিজেনৰ বিপৰীতে প্ৰায় ৮০টন অক্সিজেন উৎপাদন হৈ আছে।
কেন্দ্ৰীয় চৰকাৰৰ পৰা এতিয়া লাভ কৰা এই অতিৰিক্ত ৮০টন অক্সিজেনএ ৰাজ্যখনৰ বাবে বৃহৎ সকাহ যোগাব।
মুখ্যমন্ত্ৰীগৰাকীয়ে এই কঠিন সময়ত এই অক্সিজেনে মনোবল আৰু অক্সিজেনৰ সামৰ্থ্য বৃদ্ধি কৰিছে বুলি সদৰী কৰে।