খোদ মুখ্যমন্ত্ৰীৰ প্ৰেছ উপদেষ্টাই ভংগ কৰিলে নিৰ্বাচনী আচৰণ বিধি! নিৰ্বাচনী আয়োগলৈ পত্ৰ লিখিলে কংগ্ৰেছে
খোদ মুখ্যমন্ত্ৰীৰ প্ৰেছ উপদেষ্টা হৃষিকেশ গোস্বামীয়ে নিৰ্বাচনী আচৰণ বিধি ভংগ কৰাৰ গুৰুতৰ অভিযোগ উত্থাপন কৰিছে প্ৰদেশ কংগ্ৰেছে।
এটা চৰকাৰী পদবীত অধিষ্ঠিত থাকি কোনো বিষয়া-কৰ্মচাৰীয়ে নিৰ্বাচনী প্ৰচাৰ সভা বা কাৰ্য্যসূচীত অংশগ্ৰহণ কৰিব নোৱাৰে তথা সেই কাৰ্য্য আইনমতে দণ্ডনীয়।
তাৰ বিপৰীতে অসম প্ৰদেশ কংগ্ৰেছ কমিটিৰ দৃষ্টিগোচৰ হৈছে যে অসম চৰকাৰৰ প্ৰেছ উপদেষ্টা হৃষিকেশ গোস্বামীয়ে চৰকাৰী পদবী লৈ বিজেপিৰ নিৰ্বাচনী প্ৰচাৰ কাৰ্যসূচীত অংশ লৈ আছে।
প্ৰদেশ কংগ্ৰেছৰ মতে এই কাৰ্যসূচীয়ে নিৰ্বাচনী আচৰণ বিধি উলংঘা কৰিছে।
সেয়েহে এই ক্ষেত্ৰত নিৰ্বাচনী আয়োগক ব্যৱস্থা কৰিবলৈ আহ্বান জনাই আজি নিৰ্বাচন আয়োগলৈ এক পত্ৰ প্ৰেৰণ কৰে প্ৰদেশ কংগ্ৰেছে।
অসম প্ৰদেশ কংগ্ৰেছ কমিটিৰ লিগেল ডিপাৰ্টমেন্টৰ তৰফৰ পৰা এই সন্দৰ্ভত নিৰ্বাচনী আয়োগলৈ ব্যৱস্থা গ্ৰহণৰ দাবী জনাই এই পত্ৰ প্ৰেৰণ কৰিছে।
‘সৰ্বানন্দ সোণোৱালে যেতিয়া মুখ্যমন্ত্ৰী হিচাপে দায়িত্ব গ্ৰহণ কৰিছিল , তেতিয়া তেওঁ একাধিক উপদেষ্টা নিযুক্তি দিছিল। সেই সকল উপদেষ্টাই চৰকাৰী দায়িত্বত থাকিয়েই নিৰ্বাচনী প্ৰচাৰত অংশ গ্ৰহণ কৰি আছে নে নাই, তাক পুনৰ নিৰীক্ষণ কৰিবলৈ নিৰ্বাচন আয়োগক আহ্বান জনালোঁ।‘ নৰ্থ ইষ্ট নাওলৈ প্ৰেৰণ কৰা এক বিজ্ঞপ্তিত এইদৰে উল্লেখ কৰে কংগ্ৰেছৰ মিডিয়া বিভাগৰ অধ্যক্ষ ববিতা শৰ্মাই।
ইপিনে, বৰ্তমানলৈকে মুখ্যমন্ত্ৰীৰ প্ৰেছ উপদেষ্টা পদটো এৰি দিয়া নাই হৃষিকেশ গোস্বামীয়ে। সেয়েহে প্ৰদেশ কংগ্ৰেছৰ নিৰ্বাচনী আয়োগলৈ দাবী ‘হৃষিকেশ গোস্বামীক সেই চৰকাৰী পদবীৰ পৰা পদচ্যুত কৰিব লাগে।‘