হাস্পাতলত জুবিন গাৰ্গৰ স্বাস্থ্যৰ বুজ ল’লে মুখ্য মন্ত্ৰী সৰ্বানন্দ সোণোৱালে

দিল্লীৰ পৰা আহি বিমানবন্দৰৰ পৰা বাহিৰে বাহিৰে হাস্পাতলত জুবিন গাৰ্গৰ স্বাস্থ্যৰ বুজ ল’লে মুখ্যমন্ত্ৰী সৰ্বানন্দ সোণোৱালে।

আজি বিয়লি প্ৰায় ২ বজাত নেমকেয়াৰ হস্পিতালত উপস্থিত হৈ মুখ্য মন্ত্ৰীগৰাকীয়ে শিল্পীগৰাকীৰ স্বাস্থ্যৰ বুজ  লয়।

জুবিনক সাক্ষাৎ কৰি আহি সংবাদমাধ্যমৰ জৰিয়তে জুবিনৰ আশু আৰোগ্য কামনা কৰে সোণোৱালে।

“অসমবাসীৰ অতি মৰমৰ শিল্পী জুবিন গাৰ্গৰ আশু আৰোগ্য কামনা কৰিলো। তেওঁ পুনৰ সুস্থ হৈ উঠি সাংস্কৃতিক জগতত তেওঁৰ অৱদান আগবঢ়াই যাওক তাৰে কামনা কৰি ঈশ্বৰৰ ওচৰত প্ৰাৰ্থনা জনাইছো,”-মুখ্যমন্ত্ৰীগৰাকীয়ে সংবাদমাধ্যমৰ আগত এইদৰে কয়।

মুখ্যমন্ত্ৰীৰ সৈতে তেওঁৰ প্ৰেছ উপদেষ্টা হৃষীকেশ গোস্বামীয়েও জুবিনৰ স্বাস্থ্যৰ বুজ লয়।

চিকিৎসক ডাঃ হিতেশ বৰুৱাই জনোৱা অনুসৰি এতিয়া ক্ৰমান্বয়ে সুস্থ হৈ উঠিছে জুবিন গাৰ্গ। এতিয়া চিন্তাৰ কোনো কাৰণ নাই বুলিও তেওঁ জানিবলৈ দিয়ে।

জানিব পৰা মতে জুবিনে আহাৰ গ্ৰহণ কৰিছে আৰু লাহে লাহে খোজ কাঢ়িব পাৰিছে।

চিকিৎসালয়খনত ১২ গৰাকী চিকিৎসকৰ তত্বাৱধানত চিকিৎসা চলি আছে জুবিনৰ। কিছু পৰিমাণে জুবিন সুস্থ হৈ উঠিছে যদিও পৰীক্ষা-নিৰীক্ষাৰ বাবে দুদিন চিকিৎসালয়ত ৰখা হ’ব।

ইতিমধ্যে বিৰোধী দলপতি দেৱব্ৰত শইকীয়া,মুখ্য মন্ত্ৰীৰ আইনী উপদেষ্টা শান্তনু ভৰালীকে ধৰি ভিন্ন জনে আহি চিকিৎসালয়ত উপস্থিত হৈ জুবিনৰ স্বাস্থ্যৰ বুজ লোৱাৰ লগতে শিল্পীগৰাকীৰ আশু আৰোগ্য কামনা কৰে।

উল্লেখযোগ্য যে, কালি টাউন ক্লাৱৰ এক অনুষ্ঠানত অংশগ্ৰহণ কৰিবলৈ আহি অচেতন হৈ পৰিছিল জুবিন গাৰ্গ।