বিশিষ্ট নাট্যশিল্পী ঐশ্বৰ্য্য কাকতি, ভৱেশ বৰুৱালৈ নটসূৰ্য্য ফণী শৰ্মা বঁটা
মুখ্য মন্ত্ৰী সৰ্বানন্দ সোণোৱালে বিশিষ্ট নাট্যশিল্পী ঐশ্বৰ্য্য কাকতি আৰু ভৱেশ বৰুৱাক বৃহস্পতিবাৰে ২০২০ বৰ্ষৰ নটসূৰ্য্য ফণী শৰ্মা বঁটা প্ৰদান কৰে।
এই বঁটাত আছে এখন শৰাই, এখন প্ৰশস্তি পত্ৰ, মান বস্ত্ৰ আৰু ২ লাখ টকাৰ চেক।
অসম চৰকাৰৰ সাংস্কৃতিক সঞ্চালকালয়ৰ উদ্যোগত আৰু শোণিতপুৰ জিলা প্ৰশাসনৰ সহযোগত তেজপুৰৰ বান থিয়েটাৰত এই বঁটা প্ৰদান অনুষ্ঠান অনুষ্ঠিত হৈছিল।
অনুষ্ঠানত মুখ্য মন্ত্ৰীয়ে কয় যে ‘মহানগৰ আন্তঃগাঁথনি উন্নয়ন প্ৰকল্প’ৰ অধীনত ডেৰ কোটি টকা ব্যয়েৰে নটসূৰ্য্য ফণী শৰ্মাৰ সমাধিক্ষেত্ৰ সংৰক্ষণৰ পদক্ষেপ গ্ৰহণ কৰিব।
সোণোৱালে লগতে ঘোষণা কৰে যে জ্যোতি-বিষ্ণু-নটসূৰ্য্য-সুধাকণ্ঠৰ স্মৃতিত তেজপুৰত বিজ্ঞানসন্মতভাৱে এটা সংগ্ৰহালয় নিৰ্মাণ কৰিব।
মুখ্য মন্ত্ৰীয়ে লগতে ২.২ কোটি টকা ব্যয়েৰে পুনৰ নবীকৰণ কৰিবলগীয়া ‘ঐতিহ্যমণ্ডিত বান থিয়েটাৰ প্ৰকল্প’ৰো আধাৰশিলা স্থাপন কৰে।
বঁটা প্ৰাপক শিল্পী ঐশ্বৰ্য্য কাকতিয়ে এই বঁটা বান থিয়েটাৰৰ নামত উচৰ্গা কৰে।
আনহাতে ভ্ৰাম্যমাণ আৰু কথাছবিৰ জনপ্ৰিয় অভিনেতা ভৱেশ বৰুৱাই এই বঁটা ভ্ৰাম্যমাণ থিয়েটাৰৰ নামত উচৰ্গা কৰে।
অনুষ্ঠানত সাংস্কৃতিক পৰিক্ৰমা বিভাগৰ ৰাজ্যিক স্বতন্ত্ৰ মন্ত্ৰী নৱ কুমাৰ দলে, তেজপুৰ সমষ্টিৰ সাংসদ আৰু বিধায়ক ক্ৰমে পল্লৱ লোচন দাস আৰু বৃন্দাবন গোস্বামী, বিধায়কসকল ক্ৰমে পদ্ম হাজৰিকা, অশোক সিংহাল, গণেশ লিম্বু, প্ৰমোদ বৰঠাকুৰ আৰু ৰূপক শৰ্মা, অসম ৰাজ্যিক পণ্যাগাৰ নিগমৰ অধ্যক্ষ দিগন্ত ঘাটোৱাৰ, অসম ৰাজ্যিক বীজ নিগমৰ অধ্যক্ষ প্ৰবীণ হাজৰিকা, এমট্ৰনৰ উপাধ্যক্ষ ঋতুবৰণ শৰ্মা, শোণিতপুৰৰ উপায়ুক্ত মানৱেন্দ্ৰ প্ৰতাপ সিং, নটসূৰ্য্য ফণী শৰ্মাৰ জ্যেষ্ঠ পুত্ৰ অজিত শৰ্মা আদি উপস্থিত আছিল।