নতুন দিল্লীত বুধবাৰে অসম চুক্তিৰ ৬নং দফা বিষয়ক সমিতিৰ প্ৰথম বৈঠক

অসম চুক্তিৰ ৬নং দফা বিষয়ত পৰামৰ্শ আগবঢ়োৱাৰ বাবে শেহতীয়াকৈ গঠিত উচ্চস্তৰীয় সমিতিৰ প্ৰথমখন বৈঠক ২৪ জুলাইত নতুন দিল্লীত অনুষ্ঠিত হ’ব।

ভাৰত চৰকাৰে গঠন কৰা সমিতিখনৰ এগৰাকী সদস্যই মঙলবাৰে জনোৱা মতে, নতুন দিল্লীৰ নৰ্থ ব্লকত এই বৈঠকখন অনুষ্ঠিত হ’ব বুলি তেওঁলোকক চৰকাৰে শেহতীয়াকৈ জনাইছে।

যোৱা ১৬ জুলাইত গঠন কৰা সমিতিখনে ছমাহৰ ভিতৰত কেন্দ্ৰক তেওঁলোকৰ প্ৰতিবেদন দিয়াৰ কথা।

লগতে পঢ়ক– খিলঞ্জীয়ালৈ ভূমি সংৰক্ষণ বিনে অৰ্থহীন অসম চুক্তিৰ ৬নং দফা বিষয়ক সমিতি

অসম চুক্তিৰ ৬নং দফাত উল্লেখিত সাংবিধানিক, বিধায়িনী আৰু প্ৰশাসনিক সুৰক্ষাৰ ৰূপায়ণ সন্দৰ্ভত সমিতিখনে কেন্দ্ৰক পৰামৰ্শ আগবঢ়াব।

সমিতিখনে বিভিন্ন দল-সংগঠন, প্ৰখ্যাত ব্যক্তি, অৰ্থনীতিবিদ, আইন বিশেষজ্ঞ আদিৰ মতামত গ্ৰহণ কৰিব।

একে বিষয়ক লৈ কেন্দ্ৰই জানুৱাৰিত গঠন কৰা সমিতিখনৰ বেছিখিনি সদস্যই সমিতিখনত থাকিবলৈ অনিচ্ছা প্ৰকাশ কৰাত বৰ্তমানৰ সমিতিখন গঠন কৰা হৈছিল।

নতুন সমিতিখন গুৱাহাটী উচ্চ ন্যায়ালয়ৰ অৱসৰপ্ৰাপ্ত ন্যায়াধীশ বিপ্লৱ কুমাৰ শৰ্মাক অধ্যক্ষ আৰু অসমৰ মহাধিবক্তা ৰমেশ বৰপাত্ৰগোহাঞি, অৰুণাচল প্ৰদেশৰ মহাধিবক্তা নিলয় দত্ত, অৱসৰপ্ৰাপ্ত আই এ এছ বিষয়া সুভাষ দাস, অসম আৰক্ষী (বিশেষ শাখা)ৰ প্ৰাক্তন সঞ্চালকপ্ৰধান পল্লৱ ভট্টাচাৰ্য্য, অৱসৰপ্ৰাপ্ত অধ্যাপক সৃষ্টিধৰ দত্ত, লেখক সুমন্ত চলিহা, অধ্যাপক জয়কান্ত শৰ্মা, জ্যেষ্ঠ সাংবাদিক ৱছবিৰ হুছেইন আৰু সদৌ অসম ছাত্ৰ সন্থাৰ মুখ্য উপদেষ্টা, সভাপতি আৰু সম্পাদক ক্ৰমে সমুজ্জ্বল কুমাৰ ভট্টাচাৰ্য্য, দীপাংক নাথ আৰু লুৰিণজ্যোতি গগৈক সদস্যৰূপে লৈ গঠিত হৈছে।

গৃহ মন্ত্ৰ্যালয়ৰ যুটীয়া সচিব (উত্তৰ-পূব)ক সমিতিখনত সদস্য সচিবৰূপে নিয়োগ কৰা হৈছে।