অসমৰ ৫টা সমষ্টিত কংগ্ৰেছৰ প্ৰাৰ্থী ঘোষণা : মুঠ ১০ টা সমষ্টিৰ প্ৰাৰ্থী তালিকাত অনুমোদন
আসন্ন লোকসভা নিৰ্বাচনৰ বাবে কংগ্ৰেছে অসমৰ ৫টা সমষ্টিৰ প্ৰাৰ্থী চূড়ান্ত কৰিছে। আনহাতে, মুঠ ১০টা সমষ্টিৰ প্ৰাৰ্থীৰ চূড়ান্ত তালিকাত কংগ্ৰেছৰ কেন্দ্ৰীয় নিৰ্বাচনী সমিতিয়ে অনুমোদন জনাইছে।
প্ৰকাশ পোৱা প্ৰথমখন তালিকা অনুসৰি অসমৰ কৰিমগঞ্জত কংগ্ৰেছৰ প্ৰাৰ্থী হ’ব স্বৰূপ দাস। সেইদৰে শিলচৰত বৰ্তমানৰ সাংসদ সুস্মিতা দেবকে প্ৰাৰ্থিত্ব প্ৰদান কৰা হৈছে।
প্ৰত্যাশিতভাৱেই কলিয়াবৰত গৌৰৱ গগৈক প্ৰাৰ্থিত্ব দিয়াৰ লগতে ডিব্ৰুগড়ত কংগ্ৰেছে প্ৰাৰ্থিত্ব আগবঢ়াইছে প্ৰাক্তন কেন্দ্ৰীয় মন্ত্ৰী তথা সাংসদ পৱন সিং ঘাটোৱাৰক।
আনহাতে, যোৰহাটত এগৰাকী প্ৰাক্তন বিধায়ক সুশান্ত বৰগোঁহাইক কংগ্ৰেছে প্ৰাৰ্থিত্ব প্ৰদান কৰিছে।
কংগ্ৰেছৰ প্ৰথমখন ১৮ জনীয়া প্ৰাৰ্থীৰ তালিকাত মেঘালয়ৰ দুখন আসনৰ প্ৰাৰ্থীও ঘোষণা কৰা হৈছে।
তদুপৰি, ছিকিমৰ এখন আসনৰ লগতে তেলেংগানাৰ ৮খন আসন, নাগালেণ্ডৰ এখন আৰু উত্তৰ প্ৰদেশৰ এখন আসনৰ প্ৰাৰ্থীৰ নামো ঘোষণা কৰা হৈছে।
অসমৰ প্ৰথমখন তালিকাত নাম প্ৰকাশ পোৱা সুশান্ত বৰগোঁহাই থাওৰা সমষ্টিৰ প্ৰাক্তন বিধায়ক আছিল। কলিয়াবৰৰ গৌৰৱ গগৈ আৰু শিলচৰৰ সুস্মিতা দেব বৰ্তমানৰ সাংসদ হোৱাৰ বিপৰীতে পৱন সিং ঘটোৱাৰ ডিব্ৰুগড় সমষ্টিৰ সাংসদ হিচাপে পাঁচবাৰ বিজয়ী হৈছিল।
তদুপৰি, তেওঁ ২০১১ চনত য়ু পি এ চৰকাৰৰ ড’নাৰ তথা সংসদীয় পৰিক্ৰমা বিভাগৰ স্বতন্ত্ৰ ৰাজ্য মন্ত্ৰী আছিল। ইয়াৰ লগতে তেওঁ প্ৰদেশ কংগ্ৰেছৰ সভাপতি হিচাপেও কাৰ্যনিৰ্বাহ কৰিছিল।
আনহাতে, কৰিমগঞ্জৰ প্ৰাৰ্থী স্বৰূপ দাস জিলা কংগ্ৰেছৰ এগৰাকী নিষ্ঠাবান কৰ্মী তথা বিষয়ববীয়া আছিল যদিও নিৰ্বাচনী ৰাজনীতিত পূৰ্বে সফলতা লাভ কৰা নাই।