মাজুলীত কংগ্ৰেছ-বিজেপি : ৰিপুন বৰাৰ মতে জণ্ডিছ ৰোগীৰ দৰে সকলোতে হালধীয়া দেখিছে বিজেপিয়ে

‘‘জণ্ডিছ ৰোগীয়ে সকলোতে হালধীয়া দেখাৰ দৰে মুখ্য মন্ত্ৰী সৰ্বানন্দ সোণোৱাল আৰু হিমন্ত বিশ্ব শৰ্মাই কংগ্ৰেছৰ সকলো কামতে হালধীয়া দেখিবলৈ আৰম্ভ কৰিছে। অকল মাজুলীতেই নহয় বিজেপি দলক ইয়াৰ কু-কৰ্মৰ ফল হাতে হাতে দিয়াৰ বাবে ৰাইজে অপেক্ষা কৰি আছে অহা পঞ্চায়ত নিৰ্বাচন, লোকসভা আৰু বিধান সভা নিৰ্বাচনলৈ।’’ আজি মাজুলীত পঞ্চায়তৰ নিৰ্বাচনী সভাত উপস্থিত থাকি অসম প্ৰদেশ কংগ্ৰেছৰ সভাপতি ৰিপুন বৰাই এইদৰে কয়। ভৰিৰ তলৰ মাটি হেৰুওৱাৰ ভয়ত কম্পমান বিজেপিয়ে আজি কংগ্ৰেছক লৈ প্ৰলাপ বকিবলৈ আৰম্ভ কৰিছে। পুঁজিপতিৰ চৰকাৰ বিজেপিয়ে মাজুলী তথা অসমৰ দুখীয়া মানুহৰ মুখৰ ভাত কাঢ়ি কংগ্ৰেছ চৰকাৰে দুখীয়াৰ বাবে ৰূপায়ণ কৰা ১৩৩ খনকৈ আঁচনি বন্ধ কৰি দিয়া বুলি ব্যক্ত কৰে ৰিপুন বৰাই।

আনহাতে আজি মাজুলীত নিৰ্বাচনী প্ৰচাৰ চলাবলৈ উপস্থিত হোৱা ৰাজ্যৰ বিত্ত, গড়কাপ্তানি, স্বাস্থ্য বিভাগৰ দায়িত্বত থকা মন্ত্ৰী হিমন্ত বিশ্ব শৰ্মাই কংগ্ৰেছক অচল পাঁছশ টকীয়া নোট আখ্যা দিয়ে। মাজুলীত নিৰ্বাচনী প্ৰচাৰ চলাবলৈ আহি শৰ্মাই কংগ্ৰেছ আৰু অগপ দলক চোকা সমালোচনা কৰি ভোটাৰক আকৰ্ষিত কৰাৰ চেষ্টা কৰা দেখা যায়।

আজি দিনৰ ১২ বজাত জেংৰাইমূখ হাইস্কুল খেলপথাৰত আয়োজিত নিৰ্বাচনী সভাত অংশ গ্ৰহণ কৰি চৰকাৰী আঁচনিসমূহৰ গুণানুকীৰ্তন কৰে। সভাত কংগ্ৰেছক উপলক্ষ কৰি মন্ত্ৰী জনাগৰাকীয়ে কয় যে কংগ্ৰেছৰ শাসনৰ গাদী দখলৰ এটাই নীতি সেয়া হল ধুতি আৰু লুঙী বিলোৱা।

সিফালে কমলাবাৰীত অনুষ্ঠিত কংগ্ৰেছৰ নিৰ্বাচনী সভাত মাজুলীৰ প্ৰাক্তন বিধায়ক ৰাজীৱ লোচন পেগুৱে হিমন্তক প্ৰত্যুত্তৰ দি কয় কংগ্ৰেছে যদি ধুতি লুঙী বিলাইছিল সেইয়া হিমন্তই বিলাইছিল। কংগ্ৰেছক পুৰণি পাছশ টকীয়া নোট আখ্যা দি মন্ত্ৰী হিমন্তই কয়, ‘‘অসম তথা ভাৰতৰ মানুহে পুৰণি পাঁচশ টকীয়া নোট পেলাই দিয়াৰ দৰে কংগ্ৰেছকো উৎখ্যাত কৰিলে।’’

এই সভাতেই অগপকো চোকা ভাষাৰে সমালোচনা কৰে মন্ত্ৰী হিমন্ত বিশ্ব শৰ্মাই। অগপই সদায় ভুল সিদ্ধান্ত গ্ৰহণ কৰি আহিছে বুলিও কয় ড’ শৰ্মাই। যি সময়ত চুক্তি কৰিব নালাগে তেতিয়া কৰে আৰু যি সময়ত গুপ্তহত্যা কৰিব নালাগে সেই সময়তহে গুপ্তহত্যা কৰে বুলি তীৰ্যক মন্তব্য কৰে মন্ত্ৰী  ড০ শৰ্মাই।