নেপালত বিগত ২৪ ঘণ্টাত ৫৭ গৰাকী ক’ৰ’না আক্ৰান্ত; মুঠ সংখ্যা বৃদ্ধি ১৯১ লৈ

ভাৰতৰ চুবুৰীয়া দেশ নেপালতো ক্ৰমাৎ বৃদ্ধি পাবলৈ ধৰিছে ক’ৰ’না ভাইৰাছৰ সংক্ৰমণ।

মঙলবাৰে দেশখনত ২৪ ঘণ্টাত নতুনকৈ মুঠ ৫৭ গৰাকী ব্যক্তিৰ শৰীৰত মাৰাত্মক ক’ৰ’না ভাইৰাছৰ উপস্থিতি ধৰা পৰে।

দেশখনত এয়া হৈছে এদিনত সৰ্বাধিক সংখ্যক ক’ৰ’না ভাইৰাছত আক্ৰান্ত হোৱাৰ ঘটনা।

বিগত ২৪ ঘণ্টাত নতুনকৈ আক্ৰান্ত হোৱা ৫৭ গৰাকী ব্যক্তিকে ধৰি বৰ্তমানলৈ নেপালত মুঠ ক’ৰ’নাত আক্ৰান্ত ৰোগীৰ সংখ্যা ১৯১ গৰাকীলৈ বৃদ্ধি পায়।

বিগত এটা সপ্তাহৰ পৰা নেপালত ক’ৰ’না ভাইৰাছৰ সংক্ৰমণ দ্ৰুতভাৱে বৃদ্ধি পাবলৈ ধৰিছে।

জানিব পৰা মতে, নেপালত বৰ্তমানলৈ মুঠ ৩৩ গৰাকী লোক ক’ৰ’নাৰ সংক্ৰমণৰ পৰা চিকিৎসাৰ অন্তত আৰোগ্য লাভ কৰিছে।

নেপালে ভাৰতত ক’ৰ’নাৰ সংক্ৰমণ বৃদ্ধি পোৱাৰ সময়ৰ পৰাই ভাৰতৰ সৈতে থকা আন্তঃৰাষ্ট্ৰীয় সীমান্ত বন্ধ কৰি থৈছে।

ভাৰতে নেপালক ক’ৰ’নাৰ চিকিৎসাৰ বাবে হাইড্ৰক্সিক্লৰ’কুইনকে অত্যাৱশ্যকীয় ঔষধৰ যোগান ধৰিছিল।

ভাৰতৰ এই সহায়ৰ বাবে নেপালৰ প্ৰধান মন্ত্ৰীয়ে ভাৰতৰ প্ৰধান মন্ত্ৰী নৰেন্দ্ৰ মোদীক ধন্যবাদ জ্ঞাপন  কৰিছিল।