দেশত কৰ’না ভাইৰাছৰ ফলত মৃত্যুৰ সংখ্যা ৫৪৩জনলৈ বৃদ্ধি; আক্ৰান্ত ১৭,২৬৫জন
দেশত কৰ’না ভাইৰাছৰ সংক্ৰমণ দোপতদোপে বৃদ্ধি পাইছে।ইয়াৰ লগে লগে মৃত্যুৰ সংখ্যাও বাঢ়িছে। যোৱা ২৪ ঘন্টাত এতিয়ালৈকে সৰ্বাধিক কৰ’না আক্ৰান্ত ঘটনা সংঘটিত হৈছে।
যোৱা ২৪ ঘন্টাত দেশত কৰ’না ভাইৰাছত আক্ৰান্ত ৩৬জন লোকৰ মৃত্যু হৈছে। সেইদৰে এতিয়া দেশত মৃতকৰ সংখ্যা ৫৪৩জনলৈ বৃদ্ধি পাইছে।
কেন্দ্ৰী. স্বাস্থ্য মন্ত্ৰ্যালয়ে আজি সদৰী কৰা শেহতীয়া তথ্য অনুসৰি, যোৱা ২৪ ঘন্টাত দেশত ১৫৫৩জন নতুন কোভিড-১৯ ৰোগী ধৰা পৰিছে। ইয়াৰ ফলত দেশত মুঠ আক্ৰান্তৰ সংখ্যা ১৭,২৬৫জনলৈ বৃদ্ধি পালে।
একেৰাহে ২৬দিন লকডাউন চলাৰ পাছত সোমবাৰৰ পৰা দেশৰ কিছু অঞ্চলত কিছুমান কামকাজ আৰম্ভ হৈছে। কেন্দ্ৰই এইক্ষেত্ৰত নিৰ্দেশনাও জাৰি কৰিছে। দেশৰ যিবোৰ অঞ্চলত কৰ’নাৰ সংক্ৰমণ বৃদ্ধি পোৱা নাই তাত চৰ্তসাপেক্ষে কেইটামান সেৱা আৰম্ভ কৰাৰ অনুমতি দিয়া হৈছে।
দেশৰ ভিতৰত মহাৰাষ্ট্ৰ, মধ্য প্ৰদেশ, দিল্লী, ৰাজস্থানকে ধৰি বহুকেইখন ৰাজ্যত কৰ’নাৰ সংক্ৰমণ বৃদ্ধি পাই আহিছে।
দেশত কৰ’না ভাইৰাছৰ ফলত চিকিৎসক তথা স্বাস্থ্যকৰ্মী, আৰক্ষী, সাংবাদিককে ধৰি সকলো ক্ষেত্ৰৰ লোকেই আক্ৰান্ত হৈছে।
অসমত শেহতীয়াকৈ নতুনকৈ কোনো আক্ৰান্তৰ ঘটনা সংঘটিত হোৱা নাই।