তৃতীয় স্বদেশ অধ্যয়ন কুইজত চেম্পিয়ন কটন বিশ্ববিদ্যালয়

অসম উচ্চতৰ মাধ্যমিক শিক্ষা সংসদে আয়োজন কৰা তৃতীয় স্বদেশ অধ্যয়ন মেগা কুইজ প্ৰতিযোগিতাত চূড়ান্ত বিজয়ীৰ সন্মান লাভ কৰিছে কটন বিশ্ববিদ্যালয়ৰ বৰ্ণিল মেধি, পাৰ্থ প্ৰতীম শৰ্মা আৰু দেৱনীত দত্তই।

দ্বিতীয় আৰু তৃতীয় স্থান দখল কৰে ক্ৰমে শিৱসাগৰৰ সমুজ্জ্বল গগৈ, বুলানচি সন্দিকৈ, অংকুৰজ্যোতি ভড়ালী আৰু নলবাৰীৰ প্ৰজ্ঞাৰাণী দেৱী, বিদিশা শৰ্মা, মালৱিকা মেধিৰ দলে।

শনিবাৰে পুৱা প্ৰতিযোগিতাৰ ফাইনেল ৰাউণ্ডৰ উদ্বোধনী অনুষ্ঠানৰ মুখ্য অতিথিৰ আসনৰ পৰা প্ৰদান কৰা ভাষণত সংসদৰ প্ৰাক্তন অধ্যক্ষ দীনেশ চন্দ্ৰ বৰুৱাই নতুন শিক্ষানীতিৰ প্ৰত্যাহ্বানৰ ওপৰত আলোকপাত কৰে।

সংসদৰ সচিব মনোৰঞ্জন কাকতিয়ে সঞ্চালনা কৰা অনুষ্ঠানত সংসদৰ আন এগৰাকী প্ৰাক্তন অধ্যক্ষ নবাব মামুদ হুছেইন, প্ৰাক্তন যুটীয়া সচিব প্ৰিয়ব্ৰত লহকৰ, বিশিষ্ট নিৱন্ধকাৰ তথা অৱসৰপ্ৰাপ্ত শীৰ্ষ আমোলা ৰৱেন্দ্ৰ কুমাৰ দাসো উপস্থিত থাকে।

বিশিষ্ট শিল্পী কমল কটকীৰ কন্ঠত সুধাকণ্ঠ ভূপেন হাজৰিকাৰ গীতে সকলোকে অভিভূত কৰে।

উল্লেখযোগ্য যে, এই প্ৰতিযোগিতাৰ বিজয়ীসকলক আগন্তুক ছুকাফা দিৱসৰ কেন্দ্ৰীয় অনুষ্ঠানত মুখ্য মন্ত্ৰী সৰ্বানন্দ সোনোৱালে বঁটা প্ৰদান কৰিব।

যোৰহাটৰ চুকাফা সমন্বয় ক্ষেত্ৰত সোমবাৰে এই অনুষ্ঠানৰ আয়োজন কৰা হৈছে।