দিল্লীৰ হিংসাত্মক ঘটনা: অসমৰ দেৱাংগনা কলিতাৰ জামিন আবেদন নাকচ
‘কা’ বিৰোধী আন্দোলনৰ সময়ত বিগত বৰ্ষৰ ফেব্ৰুৱাৰী মাহত উত্তৰ পূব দিল্লীত সংঘটিত ব্যাপক হিংসাত্মক ঘটনা সন্দৰ্ভত দিল্লী আৰক্ষীয়ে গ্ৰেপ্তাৰ কৰা জৱহৰলাল নেহৰু বিশ্ববিদ্যালয়ৰ অসমৰ ছাত্ৰী দেৱাংগনা কলিতাৰ জামিন আবেদন আজি পুনৰ দিল্লীৰ এখন আদালতে নাকচ কৰে।
দিল্লীৰ কাৰকাডোমা আদালতৰ ন্যায়াধীশ অমিতাভ ৰাৱাটে দেৱাংগনাৰ জামিন আবেদন নাকচ কৰাৰ কথা ঘোষণা কৰে।আদালতে কয় যে দিল্লীৰ হিংসাত্মক ঘটনাত দেৱগনাই উচটনি দিয়াৰ প্ৰমাণ পোৱা গৈছে।
সেয়ে তেওঁৰ জামিন আবেদন মঞ্জুৰ কৰিব পৰা নহ’ব।উল্লেখ্য ৫৩ জন লোকৰ প্ৰাণহানি ঘটোৱা দিল্লীৰ সংঘৰ্ষ সন্দৰ্ভত যোৱা বছৰৰ ১৭ ছেপ্তেম্বৰত দিল্লী আৰক্ষীয়ে ১৫ জন লোকৰ বিৰুদ্ধে ১৭ হাজাৰ পৃষ্ঠাৰ অভিযোগনামা দাখিল কৰিছিল।
১৭ হাজাৰ পৃষ্ঠাৰ অভিযোগনামাৰ ভিতৰত ২৬৯২ পৃষ্ঠাত ১৫ অভিযুক্তৰ বিষয়ে বিস্তৃত ভাবে উল্লেখ কৰা হৈছে।
বাকী পৃষ্ঠাবোৰত সংঘৰ্ষৰ আনুসংগিক দিশসমূহ সামৰি লোৱা হৈছে।
কাৰকাডোমা আদালতলৈ উক্ত দিনা দুটা বৃহৎ ট্ৰাংকত ভৰাই অভিযোগনামা অনা হৈছিল।
দিল্লী আৰক্ষীয়ে অভিযোগনামাত উল্লেখ কৰা অনুসৰি কেইবাটাও হোৱাটছ এপ গ্ৰুপৰ জৰিয়তে প্ৰতিক্ৰিয়াশীল চক্ৰই হিংসা বিয়পাইছিল।
উল্লেখ্য ইতিমধ্যে ফেব্ৰুৱাৰী মাহত উত্তৰ-পূব দিল্লীত ‘কা’ বিৰোধী আন্দোলনৰ সময়ত সংঘটিত হিংসাত্মক ঘটনা সন্দৰ্ভত দিল্লী আৰক্ষীৰ বিশেষ শাখাই দিল্লীৰ জৱহৰলাল নেহৰু বিশ্ববিদ্যালয়ৰ প্ৰাক্তন ছাত্ৰ ওমৰ খালিদক গ্ৰেপ্তাৰ কৰিছিল।
খালিদৰ বিৰুদ্ধে আৰক্ষীয়ে জনতাক হিংসাত্মক কাৰ্যত লিপ্ত হব’লৈ উচটনি দিয়াৰ অভিযোগ উত্থাপন কৰিছে।
‘কা’ বিৰোধী আন্দোলনৰ সময়ত দিল্লীত সংঘটিত হিংসাত্মক ঘটনা সন্দৰ্ভত দিল্লী আৰক্ষীয়ে আন কেইবাজনো ব্যক্তিৰ বিৰুদ্ধে অভিযোগনামা দাখিল কৰিছে।
আৰক্ষীয়ে দাখিল কৰা অভিযোগনামাত চিপিএমৰ ৰাষ্ট্ৰীয় সাধাৰণ সম্পাদক সীতাৰাম য়েচুৰী, স্বৰাজ অভিযানৰ নেতা যোগেন্দ্ৰ যাদৱ, দিল্লী বিশ্ববিদ্যালয়ৰ অধ্যাপক অপূৰ্বানন্দ, বিশিষ্ট অৰ্থনীতিবিদ জয়তী ঘোষ, তথ্য চিত্ৰ নিৰ্মাতা ৰাহুল ৰয় আদিৰ নামো সন্নিবিষ্ট কৰা হৈছে।
এইসকল ব্যক্তিয়ে উত্তৰ-পূব দিল্লীত ‘কা’ বিৰোধী আন্দোলনৰ সময়ত আন্দোলনকাৰীসকলক হিংসাত জৰিত হ’বলৈ উচটনি দিয়াৰ অভিযোগ কৰা হৈছে।
দিল্লীৰ হিংসাত্মক ঘটনা সন্দৰ্ভত দিল্লী আৰক্ষীয়ে অসমৰ ছাত্ৰী দেৱাংগনা কলিতাৰ লগতে আন কেইবাগৰাকীও লোকক গ্ৰেপ্তাৰ কৰিছে।