ৰাইজৰ বৰঙনিৰে আগবাঢ়িছে অসম আৰোগ্য নিধি
অসম আৰোগ্য নিধিলৈ বিভিন্ন ব্যক্তি, অনুষ্ঠানৰ বৰঙনি অব্যাহত আছে।
কৰ’নাভাইৰাছৰ বিৰুদ্ধে যুঁজাৰ বাবে স্বাস্থ্য মন্ত্ৰী হিমন্ত বিশ্ব শৰ্মাই অসম আৰোগ্য নিধিলৈ দান-বৰঙনি আহ্বান কৰিছিল।
মন্ত্ৰী শৰ্মাই শনিবাৰে সদৰী কৰা মতে এইপৰ্য্যন্ত অসম আৰোগ্য নিধিলৈ ৯৯.২২ কোটি টকাৰ বৰঙনি লাভ কৰা হৈছে।
২৬ মাৰ্চৰ পৰা আৰম্ভ কৰি এইপৰ্য্যন্ত ৪৫৮২৯ গৰাকী ব্যক্তি আৰু অনুষ্ঠানে এই নিধিলৈ বৰঙনি আগবঢ়াইছে।
জনপ্ৰতিনিধি, ব্যৱসায়ী, চৰকাৰী, বেচৰকাৰী চাকৰিয়ালৰ পৰা আৰম্ভ কৰি কণমানি ল’ৰা-ছোৱালীলৈকে বিভিন্নজনে সাধ্য অনুসৰি নিধিলৈ বৰঙনি আগবঢ়োৱা পৰিলক্ষিত হৈছে।
অসমৰ ৰাইজৰ উদাৰতাৰ প্ৰতি কৃতজ্ঞতা প্ৰকাশ কৰি মন্ত্ৰী শৰ্মাই সকলোকে বৰঙনি আগবঢ়াবলৈ পুনৰ আহ্বান জনাইছে।
আয়কৰ আইন, ১৯৬১ৰ ৮০জি (১)ৰ অধীনত এই ন্যাসলৈ সকলো দান-বৰঙনিত ১০০ শতাংশ ৰেহাই প্ৰযোজ্য।
Gratitude Assam for this amazingly generous outpouring of your affection.
By today, our Assam Arogya Nidhi fund has reached Rs 99.22 cr. So far 45829 people have contributed. All donations are eligible for 100% deductions under 80G.
Come one, come all.#IndiaFightsCOVID19 pic.twitter.com/wnK4h8jK8l
— Himanta Biswa Sarma (@himantabiswa) April 18, 2020
অসম চৰকাৰে কৰ’নাভাইৰাছ আক্ৰান্তৰ চিকিৎসাৰ বাবে দুমাহৰ ভিতৰত পাঁচখন ৩০০ বিচনাযুক্ত চিকিৎসালয় খোলাৰ বাবে আগবাঢ়িছে।
তাৰে চাৰিখন চিকিৎসালয় দান-বৰঙনিৰ পৰা সংগৃ্হীত ধনেৰে নিৰ্মাণ কৰা হ’ব।
এই দান-বৰঙনিৰ ধনেৰে কেৱল কৰ’নাভাইৰাছৰ চিকিৎসাৰ বাবে অসমত দুমাহত চাৰিখন চিকিৎসালয় নিৰ্মাণ কৰা হ’ব।
অসম চৰকাৰে এনে পাঁচখন চিকিৎসালয় নিৰ্মাণৰ পৰিকল্পনা কৰিছে।
স্বাস্থ্য মন্ত্ৰী শৰ্মাই পূৰ্বে উল্লেখ কৰা মতে এনে প্ৰতিখন চিকিৎসালয় নিৰ্মাণৰ বাবদ ৪০ৰ পৰা ৪৫কোটি টকা ব্যয় হ’ব।
প্ৰতিখন চিকিৎসালয়ত ৩০০ বিচনাকৈ পাঁচখন চিকিৎসালয়ত ১৫০০ বিচনা কেৱল ক’ভিড-১৯ আক্ৰান্তৰ বাবে সাজু কৰা হ’ব।
ইতিমধ্যে চিকিৎসালয়কেইখনৰ নিৰ্মাণৰ কাম আৰম্ভ হৈছে।
মাৰাত্মক কৰ’নাভাইৰাছৰ বিৰুদ্ধে যুঁজাৰ বাবে চৰকাৰী পুঁজিলৈ আপুনিও বৰঙনি আগবঢ়াব পাৰে।
অসম চৰকাৰৰ অসম আৰোগ্য নিধিলৈ তলৰ বেংক একাউণ্টত বৰঙনি পঠিয়াব পাৰে—
Assam Arogya Nidhi, A/c No. 32124810101, SBI, IFSC Code: SBIN0010755