মাজুলী জিলা সমাজকল্যাণ বিষয়াৰ কাৰ্যালয় উদ্বোধন উপায়ুক্ত বিক্ৰম কৈৰীৰ

মাজুলী জিলা সমাজ কল্যাণ বিষয়াৰ কাৰ্য্যালয় শুকুৰবাৰে আনুষ্ঠানিকভাৱে উদ্বোধন কৰে মাজুলীৰ নৱ নিযুক্ত উপায়ুক্ত বিক্ৰম কৈৰীয়ে।

সদ্যহতে কাম-কাজ আগবঢ়াই নিয়াৰ বাবে গড়মূৰ থানাৰ সমীপৰ এটা ভাৰাঘৰত আৰম্ভ কৰা নতুন জিলাস্তৰীয় কাৰ্য্যালয়টোৰ শুভ উদ্বোধনী অনুষ্ঠানত জিলা সমাজ কল্যাণ বিষয়া নিৰদা দেউৰী, বিভাগটোৰ আন বিষয়া-কৰ্মচাৰীসকলৰ লগতে পোষণ অভিযান তথা প্ৰধানমন্ত্ৰী মাতৃ বন্দনা যোজনাৰ অধীনত মাজুলীৰ বাবে নিয়োজিত সমুহ প্ৰকল্প সমন্বয়কসকল আৰু অংগনবাড়ী কৰ্মী-সহায়িকাসকল উপস্থিত থাকে।

উপায়ুক্ত গৰাকীয়ে নতুন কাৰ্য্যালয়টো মুকলি কৰি বিভাগীয় বিষয়া-কৰ্মচাৰী সকলক অভিনন্দন জ্ঞাপন কৰে।

জিলা সমাজ কল্যাণ বিষয়াৰ কাৰ্য্যালয়ৰ তত্বাৱধানত মাজুলী জিলাত সমাজ কল্যাণ বিভাগৰ সকলো আঁচনি সঠিকভাৱে ৰূপায়ন নিশ্চিত হ’ব বুলিও উপায়ুক্ত কৈৰীয়ে আশা প্ৰকাশ কৰে।

মাজুলীৰ প্ৰতিগৰাকী কণ-কণ শিশু আৰু প্ৰসুতি মাতৃ তথা গৰ্ভৱতী মহিলাৰে পৰিপুষ্টিৰ দিশটো সুনিশ্চিত কৰাত সেৱাৰ মনোভাৱেৰে কাম কৰিবলৈ তেওঁ সকলোকে নিৰ্দেশ দিয়ে।