অনুপ্ৰেৰণামূলক গ্ৰন্থৰে পাঠকৰ মন জিনিছে মুম্বাইবাসী অসমীয়া যুৱতী মনীষা দলেই

এগৰাকী এয়াৰ হোষ্টেজ হিচাপে মুম্বাইত কৰ্মজীৱনৰ পাতনি মেলা অসমৰ এগৰাকী যুৱতীয়ে লিখি উলিওৱা এখন গ্ৰন্থই বহু পঢ়ুৱৈৰ মন আকৰ্ষিত কৰিবলৈ সক্ষম হৈছে।

বৰ্তমান মায়া নগৰী মুম্বাইৰ বাসিন্দা যুৱতীগৰাকী হৈছে লখিমপুৰৰ মনিষা দলে।

কিছু বছৰ পূৰ্বে এয়াৰ হোষ্টেজ হিচাপে কাম কৰি থকা মনীষাই নিজৰ কৰ্ম জীৱনৰ অভিজ্ঞতাৰে লিখি উলিয়াইছিল Get  High On Spirit নামৰ ইংৰাজী ভাষাৰ গ্ৰন্থখন।

যোৱা জুলাই মাহত মুম্বাইৰ Indus Source Books নামৰ প্ৰকাশন গোষ্ঠীটোৱে গ্রন্থখন প্ৰকাশ কৰি উলিয়াইছিল। তাৰ পাছতেই গ্ৰন্থখনে লাভ কৰিছে বিশেষ সমাদৰ।

বৰ্তমান এগৰাকী Motivational Speaker হিচাপে পৰিচিতি লাভ কৰা যুৱতী গৰাকীয়ে মানুহৰ বিভিন্ন সমস্যা সম্পৰ্কে নিজৰ জীৱনৰ অভিজ্ঞতাৰ পৰা এই গ্ৰন্থখনেৰে পৰামৰ্শ আগবঢ়াইছে।

গ্ৰন্থখনত স্থান পাইছে মানুহৰ সম্পৰ্ক, আত্মসন্মান, টকা-পইচা, যৌনতা আদি সম্পৰ্কীয় সমস্যা সমুহৰ পৰামৰ্শ।

উল্লেখ্য যে, গ্ৰন্থখন ছপা আকাৰে প্ৰকাশ কৰাৰ পূৰ্বে ই-বুক হিচাপে প্ৰকাশ কৰিছিল। ই-বুক হিচাপে Get High on Spirit গ্ৰন্থখনে ‘এমাজ’ন’ ৰ সৰ্বাধিক বিক্ৰী হোৱা গ্ৰন্থ হিচাপে পৰিগণিত হৈছিল।

এগৰাকী Motivational speaker হোৱাৰ উপৰিও মনীষা দলে এগৰাকী অভিনেত্ৰী তথা মডেল। ষ্টাৰ ভাৰতকে ধৰি কেইবাটাও চেনেলৰ কেইবাখনো জনপ্ৰিয় হিন্দী ধাৰাবাহিকত অভিনয় কৰিছে মনীষাই।