বড়োসকলৰ সমস্যাৰ স্থায়ী সমাধানৰ বাবে কেন্দ্ৰ সাজু; ডিচেম্বৰত হ’ব গুৰুত্বপূৰ্ণ ত্ৰিপাক্ষিক বৈঠক
কেন্দ্ৰীয় চৰকাৰে দীৰ্ঘদিন ধৰি সজোৰে উত্থাপিত হৈ অহা বড়োসকলৰ সমস্যাবোৰৰ স্থায়ী সমাধান কৰাৰ আশ্বাস প্ৰদান কৰিছে। ১৯ নৱেম্বৰত নতুন দিল্লীত অনুষ্ঠিত হোৱা এখন ত্ৰিপাক্ষিক বৈঠকত কেন্দ্ৰীয় গৃহ মন্ত্ৰী ৰাজনাথ সিঙে বড়ো আন্দোলনৰ প্ৰতিনিধিসকলক এই প্ৰতিশ্ৰুতি দিয়ে।
সংবাদ মাধ্যমলৈ আলোচনাটোত অংশগ্ৰহণ কৰা বড়ো সংগঠন এবছু আৰু পি জে এ চি বি এম-এ প্ৰেৰণ কৰা এটা বিবৃতিত এই কথা জানিবলৈ দিছে।
নৰ্থ ব্লকত অনুষ্ঠিত আলোচনাটোত উপস্থিত থকা কেন্দ্ৰীয় চৰকাৰ গৃহ মন্ত্ৰী ৰাজনাথ সিঙে বড়ো প্ৰতিনিধিসকলক প্ৰতিশ্ৰুতি দিয়ে যে চৰকাৰৰ ভিতৰত তথা স্বাৰ্থজড়িত পক্ষবোৰৰ সৈতে বিষয়টো আলোচনা কৰাৰ পিছত অহা ডিচেম্বৰ মাহত তেওঁলোকক পুনৰ বৈঠকলৈ মতা হ’ব। “কেন্দ্ৰীয় গৃহ মন্ত্ৰীজনে আমাক পুনৰ ডিচেম্বৰত বৈঠকলৈ মতাৰ প্ৰতিশ্ৰুতি দিছে।” এবছুৰ সভাপতি প্ৰমোদ বড়োৱে কয়।
“আমি পৰৱৰ্তী লোকসভা নিৰ্বাচনৰ পূৰ্বেই এটা সমাধান বিচাৰিছো। আজিৰ বৈঠকত আমি বড়ো জনজাতিসকলৰ ভূমিৰ সুৰক্ষা, সংস্কৃতি আৰু স্বকীয় পৰিচয়ৰ সুৰক্ষা আদি বিষয়বোৰ আলোচনা কৰিলো আৰু গৃহ মন্ত্ৰীজনে আমাক প্ৰয়োজনীয় ব্যৱস্থা লোৱাৰ আশ্বাস দিয়ে।” প্ৰমোদ বড়োৱে কয়।
আলোচনাৰ কালত বড়ো প্ৰতিনিধিকেইজনে বড়োলেণ্ডৰ দাবীৰ কথা দোহৰা বুলি বিবৃতিটোত জানিবলৈ দিয়ে।
কেন্দ্ৰীয় আৰু অসম চৰকাৰৰ প্ৰতিনিধিৰ সৈতে হোৱা আলোচনাটোত এবছুৰ সভাপতি প্ৰমোদ বড়োকে ধৰি অন্যান্য প্ৰতিনিধি, পি জে এ চি বি এমৰ ৰাকেশ বড়ো আৰু গৰ্জন মুছাহাৰী আৰু দুজনকৈ প্ৰাক্তন সাংসদ ক্ৰমে য়ু জি ব্ৰহ্ম আৰু এছ কে বিচমুতিয়াৰি উপস্থিত আছিল।
ইফালে সংবাদ মাধ্যমৰ আগত প্ৰমোদ বড়োৱে কয় যে তেওঁলোকে এইকেইদিন খবৰ ওলোৱাৰ দৰে কেন্দ্ৰীয় শাসিত পৰিষদ (য়ু টি চি)ৰ বিষয়ে কোনো আলোচনা কৰা নাছিল। “কিছু সংখ্যক সংবাদ মাধ্যমত প্ৰকাশ হোৱাৰ দৰে কেন্দ্ৰীয় শাসিত পৰিষদ (য়ু টি চি)ৰ বিষয়ে কোনো আলোচনা হোৱা নাছিল।” প্ৰমোদ বড়োৱে কয়। ইয়াক তেওঁ বড়ো আন্দোলনটো বিপথে পৰিচালিত কৰিব খোজা কোনো পক্ষৰ অপপ্ৰচাৰ বুলি কয়।
উল্লেখযোগ্য যে বড়োলেণ্ডৰ দাবীৰ এটা সমাধান সূত্ৰ হিচাপে বড়ো কেন্দ্ৰীয় শাসিত পৰিষদ (য়ু টি চি) গঠন কৰিবলৈ কেন্দ্ৰীয় চৰকাৰৰ সৈতে বড়ো সংগঠনবোৰৰ এটা বুজাবুজি হোৱা বুলি দুদিনমান পূৰ্বে খবৰ প্ৰচাৰ হৈছিল। ইয়াকে লৈ সমগ্ৰ নামনি অসমত অবড়ো ৰাইজ, দল-সংগঠনৰ ক্ষোভৰ জুই দেখা গৈছিল। বন্ধ আহ্বানেৰে প্ৰতিবাদ কৰিছিল কোচ ৰাজবংশী সন্মিলনীয়ে।