প্ৰতিবাদী কৃষকৰ ধৈৰ্য দেখি তাজ্জৱ মানিলে কেজৰিৱালে, ক’লে—’শিকিবলগীয়া বহু আছে’
আৰক্ষীৰ নিৰ্যাতন, হত্যা, গ্ৰেপ্তাৰ আদিৰ পিছতো পিছ হুহকি যোৱা নাই দেশৰ প্ৰতিবাদী কৃষকসকল।
অসীম ধৈৰ্যৰ পৰিচয় দি তেওঁলোকে সফলতাৰ বাটত ক্ৰমাৎ অগ্ৰসৰ হৈছে। কৃষকৰ এনে ধৈৰ্য দেখি তৱধ মানিছে দিল্লীৰ মুখ্যমন্ত্ৰী তথা আম আদমী পাৰ্টীৰ নেতা অৰবিন্দ কেজৰিৱালে।
কেজৰিৱালে টুইটাৰত হিন্দীতে লিখিছে যে কৃষকসকলে যি ধৈৰ্যৰ বলত সফলতা লাভ কৰিবলৈ সক্ষম হৈছে তাৰ পৰা দেশে শিক্ষা ল’ব পাৰে।
উল্লেখ্য কৃষকে আৰম্ভ কৰা আন্দোলনে আজি এবছৰ পূৰ্ণ কৰিলে।
আজি বাহাদুৰগড়ত সংযুক্ত কিষাণ মৰ্চাৰ উদ্যোগত আয়োজন কৰা হয় কৃষক সমাৱেশৰ।
এই সমাৱেশতে অল ইণ্ডিয়া কিষাণ সভাৰ সভাপতি অশোক ধাৱালে কয় যে কেন্দ্ৰই কৃষকৰ দাবীসমূহ পূৰণ নকৰা পৰ্যন্ত আন্দোলন চলাই যোৱা হ’ব।
দেশৰ বিভিন্ন ৰাজ্যতো আজি অনুষ্ঠিত কৰা হয় সমাৱেশ। ২৯ নৱেম্বৰৰ পৰা সংসদৰ শীতকালীন অধিৱেশন অনুষ্ঠিত হ’ব আৰু এই অধিৱেশনতে চৰকাৰে নূন্যতম সমৰ্থন মূল্য সন্দৰ্ভত সিদ্ধান্ত লোৱাৰ দাবী জনাইছে কৃষকসকলে।
প্ৰতিবাদী কৃষকসকলে লগতে লখিমপুৰ খেৰীৰ কৃষক হত্যাত জৰিত কেন্দ্ৰীয় ৰাজ্যিক মন্ত্ৰী অজয় মিশ্ৰক মন্ত্ৰী সভাৰ পৰা অপসাৰণ কৰাৰ উপৰি তেওঁক গ্ৰেপ্তাৰ কৰাৰো দাবী উত্থাপন কৰে।
উল্লেখ্য প্ৰধানমন্ত্ৰী নৰেন্দ্ৰ মোদীয়ে গুৰু নানক জয়ন্তীৰ দিনা তিনিও খন কৃষি বিধেয়ক বাতিল কৰিব বুলি ঘোষণা কৰিছিল।
কেন্দ্ৰীয় কেবিনেটেও অলপতে তিনিওখন বিতৰ্কিত কৃষি আইন বাতিল কৰাৰ ক্ষেত্ৰত অনুমোদন জনায়।