ধনৰ বাবে মহিলাক প্ৰতাৰণা আই পি এছ বিষয়াৰূপী প্ৰতাৰকৰ: তদন্তত ওলাল জোলোঙাৰ মেকুৰী

ধন ঘটাৰ বাবে মানুহে নানা কৌশলী পন্থাৰ আশ্ৰয় লয়। পিছে সহজলভ্য ধনৰ আশাত বহু লোকে অৱলম্বন কৰে আনক প্ৰতাৰণাৰ পথ। মিথ্যাচাৰিতাৰে মানুহক প্ৰতাৰণা কৰা নানা ঘটনা নিশ্চয় শুনিবলৈ পাইছে। কিন্তু এনে ঘটনাৰ পৰা জনসাধাৰণক নিৰাপত্তা দিয়া আৰক্ষীৰ ৰূপতে প্ৰতাৰকে লুণ্ঠন চলোৱাৰ কথা কল্পনা কৰিব পাৰেনে?

অবিশ্বাস্য হ’লেও এই ঘটনা সংঘটিত হৈছে দেশৰ ৰাজধানী চহৰ দিল্লীত। উত্তৰ প্ৰদেশৰ কেডাৰৰ আই পি এছ বিষয়াৰ ৰূপ লৈ দিল্লীত ধনৰ বাবে মহিলাক প্ৰতাৰণা কৰি ৰঙাঘৰৰ আলহী হৈছে এগৰাকী ব্যক্তি।

কোনো শিক্ষাগত অৰ্হতাৰ প্ৰমাণ পত্ৰ নোহোৱাকৈ মধ্যপ্ৰদেশৰ গোৱালিয়ৰৰ বাসিন্দা বিকাশ গৌতম নামৰ লোকজনে আই আই টি কানপুৰৰ স্নাতক আৰু এগৰাকী আই পি এছ বিষয়াৰ ৰূপত চিনাকি দি কেৱল মহিলাসকলক প্ৰতাৰণা কৰাৰ জাল পেলায়।

দিল্লীত এগৰাকী মহিলা চিকিৎসকে দাখিল কৰা এজাহাৰৰ ভিত্তিত আউটাৰ দিল্লীৰ চাইবাৰ চেলে বিকাশক গ্ৰেপ্তাৰ কৰে। আই পি এছ বিষয়াৰ ৰূপ লৈ বিকাশে তেওঁৰ পৰা ২৫ হাজাৰ টকা লৈছিল বুলি অভিযোগ কৰে ছানীয়ে।

এজাহাৰ লাভ কৰাৰ লগে লগে দিল্লী আৰক্ষীয়ে তদন্ত আৰম্ভ কৰে আৰু প্ৰতাৰক ভুৱা আই পি এছ বিষয়াৰ ৰূপ লোৱা বিকাশ গৌতমক গ্ৰেপ্তাৰ কৰে। আৰক্ষীৰ তদন্তত ধৃত বিকাশে ফেচবুক আৰু ইনষ্টাগ্ৰামত আই পি এছ বিষয়া বুলি দাবী কৰি ভুৱা প্ৰফাইল চলাই থকাৰ প্ৰমাণো পোহৰলৈ আহে।

এই ভুৱা ছ’চিয়েল মিডিয়া প্ৰফাইলৰ জৰিয়তে বিকাশে কেইবাগৰাকীও আমোলাৰ সৈতে পোজ দিয়া কেইবাখনো ছবি আপলোড কৰে।

তদন্তৰ সময়ত আৰক্ষীয়ে উদ্ধাৰ কৰা তথ্য অনুসৰি বিকাশ অষ্টম মান উত্তীৰ্ণ হোৱাৰ পাছত দিল্লীলৈ যায় আৰু মুখাৰ্জী নগৰ অঞ্চলৰ এখন ৰেষ্টুৰেণ্টত কাম কৰিবলৈ আৰম্ভ কৰে।

এই ৰেষ্টুৰেণ্টখনলৈ কেইবাগৰাকীও অসামৰিক সেৱাৰ বিষয়াই সঘনে অহা-যোৱা কৰিছিল। তেতিয়াই এই প্ৰতাৰণাৰ জালখনৰ পৰিকল্পনা কৰিছিল বিকাশে।