২০০৭ চনৰ লজ্জাজনক “বেলতলা কাণ্ড”ৰ দিনটোক ক’লা দিৱস হিচাপে পালন আদিবাসী ছাত্ৰ সন্থাৰ

২০০৭ চনত ঘটা এটা পাহৰিব নোৱৰা অবিচাৰ, অমানৱীয় ঘটনাক সুঁৱৰি টংলা নগৰত সদৌ আদিবাসী ছাত্ৰ সন্থা, অসমৰ ওদালগুৰি শাখাই আজিৰ দিনটোক ক’লা দিৱস হিচাপে পালন কৰে।

সংগঠনটোৰ সভাপতি জাষ্টিন লক্ৰাৰ নেতৃত্বত ছাত্ৰ সংগঠনটোৰ কৰ্মীসকলে এই উপলক্ষে বন্তি প্ৰজ্বলন কৰে।

২০০৭ চনৰ আজিৰ দিনটোতে (২৪ নৱেম্বৰ) গুৱাহাটী মহানগৰীৰ ৰাজপথত সভ্য নাগৰিকেৰে গঠিত এটা উন্মত্ত দলৰ হাতত বিবস্ত্ৰা হৈছিল লক্ষ্মী ওৰাং নামৰ এগৰাকী আদিবাসী যুৱতী।

আদিবাসীসকলক জনজাতিৰ মৰ্য্যাদা দিয়াৰ দাবীত সদৌ অসম আদিবাসী ছাত্ৰ সন্থাই গুৱাহাটীত এটা প্ৰতিবাদী সমদল উলিয়াইছিল। বেলতলাত হোৱা প্ৰতিবাদী সমদলটোৱে দিচপুৰ অভিমুখে খোজকাঢ়ি আহি থকাৰ সময়ত মহানগৰীবাসী একাংশ স্থানীয় লোকে প্ৰতিবাদকাৰীসকলে হিংসাত্মক আচৰণ কৰা বুলি অভিযোগ আনি তেওঁলোকৰ সৈতে সংঘাতত লিপ্ত হৈছিল। তাৰ পিছতে এই লজ্জাজনক ঘটনাটো ঘটাইছিল মহানগৰীৰ তথাকথিত সভ্য সমাজে।

লগতে পঢ়ক এক দশকৰ পিছত লক্ষ্মী ওৰাঙক আকৌ এবাৰ নগ্ন কৰিলে বিজেপিৰ সমৰ্থকে

একাংশই লক্ষ্মীক নগ্ন কৰি দৌৰাই দৌৰাই পিটাৰ উপৰি নিৰ্মমভাৱে প্ৰহাৰ কৰিছিল আন আন প্ৰতিবাদকাৰীসকলকো।

এই ঘটনাৰ দুখজনক সোঁৱৰণ কৰাৰ উপৰি উপস্থিতসকলক সম্বোধন কৰি লাক্ৰাই কয়, “আন ৰাজ্যত আদিবাসীসকলৰ জনজাতিৰ স্বীকৃতি পাইছে যদিও কংগ্ৰেছ আৰু বিজেপিৰ চৰকাৰ উভয়েই সম্প্ৰদায়টোক জনজাতিকৰণৰ পৰা বঞ্চিত কৰি প্ৰতাৰণা কৰি আহিছে।”

উল্লেখ কৰিব পাৰি যে মহানগৰীৰ মানুহৰ হিংস্ৰতাৰ ফলত প্ৰাণৰ মমতাত সম্পূৰ্ণ উলংগ হৈ দৌৰি থকা অৱস্থাতো যুৱতীগৰাকীক কেইজনমানে প্ৰহাৰ কৰিছিল আৰু নিৰ্লজ্জ বহুকেইজনে তেওঁৰ ফটো উঠোৱাত ব্যস্ত আছিল।

ঘটনাটোৰ পিছত অসমৰ একাংশ সংবাদ মাধ্যমৰ ভূমিকাও আছিল অতি পক্ষপাতমূলক আৰু ঘটনাটোৰ বাবে প্ৰতিবাদকাৰীসকলৰ আচৰণক দায়ী কৰাৰ প্ৰৱণতাৰে বাতৰি পৰিৱেশন কৰিছিল।