দেশৰ মুখ্য ন্যায়াধীশৰ প্ৰতি যথোচিত মনোযোগত অৱহেলা : নিলম্বিত হ’ল উপ আৰক্ষী আয়ুক্ত আৰু অতিৰিক্ত উপায়ুক্ত

দেশৰ মুখ্য ন্যায়াধীশ ৰঞ্জন গগৈৰ অসম ভ্ৰমণৰ সময়ত তেওঁৰ নিৰাপত্তাৰ দিশটোৰ প্ৰতি যথোচিত মনোযোগ প্ৰদৰ্শনত ব্যৰ্থতাৰ বাবে আজি ৰাজ্যৰ প্ৰশাসনে গুৱাহাটী (পশ্চিম) উপ আৰক্ষী আয়ুক্ত ভৱৰলাল মীনা আৰু কামৰূপ মহানগৰ জিলাৰ অতিৰিক্ত উপায়ুক্ত প্ৰশান্ত কাঠকটীয়াক নিলম্বন কৰে।

উল্লেখযোগ্য যে দেশৰ মুখ্য ন্যায়াধীশৰ পদত আসীন হোৱাৰ পিছত ন্যায়াধীশ ৰঞ্জন গগৈয়ে যোৱা ১৬ অক্তোবৰত প্ৰথমবাৰৰ বাবে তেওঁৰ গৃহ ৰাজ্যলৈ আহিছিল। ৰাজ্য চৰকাৰে তেওঁক বিমান বন্দৰত ৰঙা দলিচা পাৰি ৰাজ্যিক মৰ্য্যাদা দি আদৰিছিল।

কিন্তু মুখ্য ন্যায়াধীশজনে যোৱা ১৭ অক্তোবৰত সপত্নীক কামাখ্যা মন্দিৰ দৰ্শনৰ বাবে যাওঁতে তাত অপ্ৰীতিকৰ পৰিস্থিতিৰ মুখামুখি হৈছিল। একে সময়তে বিজেপিৰ ৰাষ্ট্ৰীয় সভাপতি অমিত শ্বাহেও কামাখ্যা ভ্ৰমণ কৰাত আৰক্ষী ব্যস্ত হৈ পৰিছিল শ্বাহৰ নিৰাপত্তাৰ দিশক লৈ।

ফলত দেশৰ মুখ্য ন্যায়াধীশজনৰ নিৰাপত্তাৰ দিশটোত সঠিক ব্যৱস্থাৰ অভাৱৰ বাবে মুখ্য ন্যায়াধীশ গগৈ ভিৰত আবদ্ধ হৈ থাকিব লগীয়া হৈছিল। বিশেষকৈ অমিত শ্বাহক লৈ ব্যস্ত বিজেপিৰ সমৰ্থকে সৃষ্টি কৰিছিল অভাৱনীয় পৰিস্থিতি।

এই সন্দৰ্ভত মুখ্য ন্যায়াধীশজনে কামৰূপ মহানগৰ জিলা প্ৰশাসনক টেলিফোনত কিয় এয়া হ’বলৈ পাইছে বুলি প্ৰশ্ন কৰিছিল বুলি জানিব পৰা গৈছে।