কৃষক মুক্তি সংগ্ৰাম সমিতিৰ ধৈৰ্য্য কোঁৱৰ আৰু বিতু সোণোৱালক পুনৰ ১০ দিনৰ NIA ৰ জিন্মালৈ

কৃষক মুক্তি সংগ্ৰাম সমিতিৰ সাধাৰণ সম্পাদক ধৈৰ্য্য কোঁৱৰ আৰু ছাত্ৰ মুক্তি সংগ্ৰাম সমিতিৰ সভাপতি বিতু সোণোৱালক পুনৰ ১০ দিনৰ NIA ৰ জিন্মালৈ প্ৰেৰণ কৰা হৈছে।

মঙলবাৰে NIA-ই দুপৰীয়া প্ৰায় ১২ বজাত চান্দমাৰিস্থিত NIA আদালতত দুয়োকো হাজিৰ কৰাই পুনৰ দুয়োকো ১০ দিন নিজৰ জিম্মাত বিচাৰিছিল আৰু আদালতে NIA ৰ আবেদন মঞ্জুৰ কৰি দুয়োজন নেতাক ১০ দিনৰ বাবে NIA-ক নিজৰ জিম্মাত দিয়ে।

দুয়োজন নেতাকে প্ৰায় ৫ ঘণ্টা ধৰি NIA ৰ আদালতত ৰখা হৈছিল।

আনহাতে, আদালতত হাজিৰ হৈ বিকল্প ৰাজনৈতিক দলতকৈ CAA বিৰোধী আন্দোলনত জনসাধাৰণক অধিক মনোনিবেশ কৰিবলৈ আহ্বান জনায় ধৈৰ্য কোঁৱৰে। লগতে তেওঁলোকক গ্ৰেপ্তাৰ কৰাটো ৰাজনৈতিক ষড়যন্ত্ৰ বুলি অভিযোগ কৰে কৃষক নেতাজনে।

‘আন্দোলনৰ গতি-বিধিক লৈ কৃষক মুক্তি সংগ্ৰাম সমিতিৰ উপদেষ্টা অখিল গগৈ, মই আৰু বিতু সোণোৱাল উদ্বিগ্ন। জেইলৰ ভিতৰত আমি কথা পাতিছো। এতিয়া যি আন্দোলন চলি আছে সি অতিকৈ লেহেমীয়া হৈছে। আন্দোলনৰ অভিকেন্দ্ৰ অন্য দিশে লৈ যোৱা হৈছে। চৰকাৰক বাধ্য কৰাব পৰাকৈ আন্দোলন হোৱা নাই। ৰাজনৈতিক বিকল্পৰ প্ৰসংগতকৈ ‘কা’ বাতিল প্ৰসংগটোহে মূল লক্ষ্য হ’ব লাগে। সদৌ অসম ছাত্ৰ সন্থা, কৃষক মুক্তি সংগ্ৰাম সমিতি, জাতীয়তাবাদী যুৱ ছাত্ৰ পৰিষদ, শিল্পী সমাজ, নাগৰিক সমাজ আৰু ছাত্ৰ সমাজ একত্ৰিত হৈ বৃহৎ গণ আন্দোলন গঢ়ি তুলিব লাগে’, কোঁৱৰৰ মন্তব্য।

ইপিনে, তেওঁলোকক গ্ৰেপ্তাৰ কৰাটো ৰাজনৈতিক ষড়যন্ত্ৰ বুলি অভিযোগ কৰি কৃষক নেতাজনে কয় ‘এয়া চৰকাৰৰ গভীৰ ষড়যন্ত্ৰ। আমি এটা গণ সংগঠন, অসমৰ জাতীয় জীৱনৰ বাবে আমি কাম কৰি আছো। মুঠতে চৰকাৰ পগলা গৈছে।