কাৰ গাফিলতিৰ বাবে জুবিন গাৰ্গক হেৰুৱালো? তাৰছেম মিট্টাল আৰু সিদ্ধাৰ্থৰ বিৰুদ্ধে গুৰুতৰ অভিযোগ

জুবিন গাৰ্গৰ আকস্মিক মৃত্যুৰ বাবে জগৰীয়া নেকি অনা-অসমীয়া লবী? কেৱল টকা উপাৰ্জনৰ আহিলা হিচাপে ব্যৱহাৰ কৰা হৈছিল নেকি জুবিনক? এই প্ৰশ্ন আজি এইবাবেই আলোচনাৰ মাজলৈ অনা হৈছে কাৰণ জুবিন গাৰ্গৰ একালৰ ঘনিষ্ঠ ৰিতু কলিতা নামৰ এজন ব্যক্তিয়ে ফেচবুকযোগে বহুকেইটা অভিযোগ উত্থাপন কৰিছে। ৰিতু কলিতাই ২০ ছেপ্টেম্বৰত ফেচবুক লাইভ যোগে প্ৰকাশ কৰা এক ভিডিঅ’ত বহুকেইটা গুৰুতৰ অভিযোগ শুনা গৈছে। ৰিতু কলিতাই অভিযোগ কৰা অনুসৰি জুবিন গাৰ্গৰ পূৰ্বৰ মেনেজাৰ আছিল তাৰছেম মিট্টাল নামৰ এজন অনা-অসমীয়া।

https://www.facebook.com/share/v/19fq5nL8tw

প্ৰাপ্ত তথ্য অনুসৰি ২০০৪ চনত গুৱাহাটী বাণিজ্য মহাবিদ্যালয়ৰ পৰা স্নাতক ডিগ্ৰী লাভ কৰা তাৰছেম মিট্টালে বৰ্তমান তাৰছেম মিট্টাল টেলেণ্ট মেনেজমেণ্ট নামৰ এটা কোম্পানী চলায়। অৰিজিৎ সিং, সুনিধি চৌহান, বিশাল ভৰদ্বাজ, অমিত ত্ৰিবেদী, বিশাল-শেখৰ, ৰেখা ভৰদ্বাজ, ছাজিদ-ৱাজিদ, হৰিহৰণকে ধৰি ভাৰতৰ ২৬ গৰাকী শীৰ্ষ সংগীতজ্ঞৰ ব্যৱস্থাপনাৰ লগত তাৰছেম আৰু তেঁওৰ কোম্পানী জড়িত। লগতে তাৰছেম মিট্টালে জুবিন গাৰ্গ আৰু জুবলীৰো ব্যৱস্থাপনাৰ দিশ চোৱাচিতা কৰিছিল। ৰিতু কলিতাৰ মতে, তাৰছেম মিট্টালে কেৰিয়াৰৰ শ্ৰীবৃদ্ধিৰ বাবে মুম্বাই গুচি যোৱাৰ পাছতে মাৰোৱাৰী যুৱক সিদ্ধাৰ্থ শৰ্মাক জুবিন গাৰ্গৰ মেনেজমেণ্ট চাবলৈ দায়িত্ব দি যায়। কিন্তু কলিতাৰ মতে, জুবিন গাৰ্গৰ যতন লোৱাৰ পৰিৱৰ্তে সিদ্ধাৰ্থই কেৱল মাত্ৰ টকা ঘটাৰ আহিলা হিচাপেহে জুবিনক ব্যৱহাৰ কৰিছিল।

স্বাভাৱিকতে সাধাৰণ মানুহৰ মাজত থাকি ভালপোৱা অসাধাৰণ জুবিনৰ প্ৰতি সিদ্ধাৰ্থৰ এনে মানসিকতাৰ অভিযোগক সহজে ল’ব পৰা নাই জুবিনপ্ৰেমীসকলে। সেয়েহে জুবিনৰ এই আকস্মিক মৃত্যুৰ তদন্ত দাবী কৰিছে গুণমুগ্ধই।