কোন হ’ব কৰ্ণাটকৰ মুখ্যমন্ত্ৰী? দাবীদাৰ ডি কে শিৱকুমাৰৰে কৰিলে তাৎপৰ্যপূৰ্ণ মন্তব্য
কোন হব কৰ্ণাটকৰ পৰৱৰ্তী মুখ্যমন্ত্ৰী? এই প্ৰশ্নই দেশৰ ৰাজনৈতিক মহলত ব্যাপক চৰ্চা লাভ কৰি থকাৰ সময়তে মুখ্যমন্ত্ৰীত্বৰ অন্যতম দাবীদাৰ ডি কে শিৱৰকুমাৰে অতি তাৎপৰ্যপূৰ্ণ মন্তব্য কৰিছে।
কংগ্ৰেছ হাইকামাণ্ডৰ নিৰ্দেশ মৰ্মে দিল্লীলৈ উৰা মৰাৰ পূৰ্বে কৰ্ণাটকৰ প্ৰদেশ কংগ্ৰেছৰ সভাপতি ডি কে শিৱকুমাৰে কয় যে তেওঁ নিজকেই একক সংখ্যাগৰিষ্ঠ বুলি গণ্য কৰে সেয়ে তেওঁৰ লগত কিমান বিধায়কৰ সমৰ্থন আছে সেইটো তেওঁৰ বিচাৰ্য বিষয় নহয়।
“যোৱা পাঁচ বছৰত ৰাজ্যৰ ৰাজনীতি কি হৈছিল সেয়া মই এতিয়াই প্ৰকাশ কৰিব নিবিচাৰো। কিন্তু এদিন প্ৰকাশ কৰিম। আমাৰ চৰকাৰ পতন ঘটাই বহু বিধায়কে এৰি যোৱাৰ সময়তো মোৰ অন্তৰ ভাঙি পৰা নাছিল।” ডি কে শিৱকুমাৰে সাংবাদিকৰ আগত এইদৰে কয়।
উল্লেখ্য যে শনিবাৰে ঘোষিত কৰ্ণাটকৰ বিধানসভাৰ নিৰ্বাচনত কংগ্ৰেছে ১৩৫ খন আসনত বৃহৎ বিজয় সাব্যস্ত কৰে। ইয়াৰ পাছৰে পৰা ৰাজ্যখনৰ নতুন মুখ্যমন্ত্ৰী কোন হ’ব তাকেই ব্যাপক জল্পনা কল্পনা অব্যাহত আছে। প্ৰাক্তন মুখ্যমন্ত্ৰী সিদ্দাৰমাইয়া আৰু সভাপতি ডি কে শিৱকুমাৰ দুয়ো মুখ্যমন্ত্ৰীত্বৰ দাবীদাৰ।
দেওবাৰে নৱনিৰ্বাচিত বিধায়কসকলে বিধায়নী দলৰ নেতা অৰ্থাৎ কোন মুখ্যমন্ত্ৰী হ’ব সেই সিদ্ধান্ত লোৱাৰ কৰ্তৃত্ব দলৰ ৰাষ্ট্ৰীয় সভাপতি মল্লিকাৰ্জুন খাৰ্গেক দিয়ে। ইয়াৰ পাছতে মুখ্যমন্ত্ৰীত্বৰ দাবীদাৰ দুয়োগৰাকী নেতাকে হাই কামাণ্ডে দিল্লীলৈ তলৱ কৰিছে।
দুয়োগৰাকী নেতাক দিল্লীলৈ তলৱ কৰিলেও কংগ্ৰেছ হাই কামাণ্ড কিছু বিপাঙত পৰা বুলি ধাৰণা কৰা হৈছে। সিদ্দাৰমাইয়া এজন প্ৰবীণ আৰু অভিজ্ঞ নেতা হ’লেও শিৱকুমাৰ হৈছে ৰাজ্যখনৰ এজন জনপ্ৰিয় আৰু দক্ষ নেতা।
ইপিনে সিদ্দাৰমাইয়াই তেওঁৰ লগত অধিক বিধায়ক থকা বুলি দাবী কৰাৰ প্ৰত্যুত্তৰত শিৱকুমাৰে অতি তাৎপৰ্যপূৰ্ণভাৱে কয় যে সাহসী লোক এজন নিজেই সংখ্যাগৰিষ্ঠ।
“মোৰ নেতৃত্বত আমাৰ হাতত ১৩৫ জন বিধায়ক আছে আৰু সকলোৱে বিষয়টো দলৰ হাইকমাণ্ডৰ ওপৰত এৰি দিছে। মোৰ হাতত কোনো ব্যক্তিগত সংখ্যা নাই। মোৰ লগতে আছে কেৱল কংগ্ৰেছৰ সংখ্যা।” ডি কে শিৱকুমাৰে কয়।
ইফালে, ডি কে শিৱকুমাৰ আৰু সিদ্দাৰমাইয়াৰ মুখ্যমন্ত্ৰীত্বৰ দৌৰে ৰাজস্থানৰ দৰে পৰিস্থিতিৰ সৃষ্টি কৰিব নেকি বুলি সাংবাদিকে কৰা প্ৰশ্ন এৰাই চলি শিৱকুমাৰে কয় যে মল্লিকাৰ্জুন খৰ্গে, ছোনিয়া গান্ধী আৰু ৰাহুল গান্ধীৰ লগতে ৰাজ্যখনৰ কংগ্ৰেছ নেতাসকলৰ ওপৰত তেওঁৰ আস্থা আছে।