তিনিচুকীয়াৰ কাষৰীয়া অৰুণাচল প্ৰদেশত ধাৰাবাহিকভাৱে আটক ড্ৰাগ সৰবৰাহকাৰী

তিনিচুকীয়া জিলাৰ সীমামূৰীয়া অৰুণাচল প্ৰদেশৰ মিয়াওত শেহতীয়াকৈ ধাৰাবাহিকভাৱে আৰক্ষীৰ জালত পৰিছে ইজনৰ পিছত সিজন ড্ৰাগছ সৰবৰাহকাৰী।

যোৱা ১৭ আগষ্টৰ পৰা শুকুৰবাৰৰ নিশালৈকে মিয়াও আৰক্ষীয়ে মুঠ ৫জন সৰবৰাহকাৰীক ড্ৰাগছসহ আটক কৰিবলৈ সক্ষম হৈছে।

শুকুৰবাৰে নিশা ১৩ গ্ৰাম ব্ৰাউন চুগাৰৰ সৈতে আটক কৰা হৈছে ইন্দং গাম চিংফৌ ওৰফে কালাগাম নামৰ এজন ড্ৰাগছ সৰবৰাহকাৰীক।

মহকুমা আৰক্ষী বিষয়া টাচি দৰং আৰু মিয়াও আৰক্ষী থানাৰ ভাৰপ্ৰাপ্ত বিষয়া ইগে এটেই গোপন তথ্যৰ ভিত্তিত অভিযান চলাই তেখেতক আটক কৰিছে।

মিয়াও চৰকাৰী উচ্চতৰ মাধ্যমিক বিদ্যালয়ৰ সমীপৰ গাৰা লাইনৰ পৰা ব্যক্তিজনক আটক কৰা হৈছে৷

ধৃত ড্ৰাগছ সৰবৰাহকাৰীজনৰ বিৰুদ্ধে এন ডি পি এচ আইনৰ ২১ (বি) ধাৰাত এক গোচৰ (নং ২৭/২০১৯) ৰুজু কৰা হৈছে৷

সূত্ৰমতে, ম্যানমাৰৰ পৰা সীমান্ত পাৰ হৈ ড্ৰাগছৰ এই চোৰাং বেহা চলি আছে।

মিয়াওকে ধৰি খাৰচাং, চাংলাং, জয়ৰামপুৰ আদি অঞ্চলত অৰুণাচল আৰক্ষীয়ে ড্ৰাগছৰ বিৰুদ্ধে ব্যাপক অভিযান আৰম্ভ কৰিছে।

কিন্তু সীমামূৰীয়া অঞ্চলটোৰ একাংশ লোকৰ অভিযোগ, অসম আৰক্ষীয়ে বৰ্তমানলৈকে তেনে অভিযান চলোৱা নাই আৰু সেয়ে কথাটোত ৰহস্যৰ গোন্ধ থকা বুলি চৰ্চা চলিছে৷

তিনিচুকীয়া জিলাৰ অসম-অৰুণাচল সীমামূৰীয়া অঞ্চলসমূহত ব্যাপক ৰূপত ড্ৰাগছ-কানিয়ে চানি ধৰাৰ ফলত যুৱ প্ৰজন্ম ধ্বংসৰ দিশে গতি কৰা বুলি বিভিন্ন দল-সংগঠনে ধাৰাবাহিকভাৱে প্ৰতিবাদ জনাই আহিছে।