চিৰিয়াখানাৰ ভিতৰত ভালুকক পানীত ডুবাই মৰাৰ চেষ্টা এজন নিচাসক্ত যুৱকৰ
চিৰিয়াখানাৰ ভিতৰত এজন নিচাসক্ত যুৱকে এটা ভালুকক পানীত ডুবাই মৰাৰ চেষ্টা চলোৱা ভিডিঅ’ ভাইৰেল হোৱাক কেন্দ্ৰ কৰি তীব্ৰ প্ৰতিক্ৰিয়াৰ সৃষ্টি হৈছে।
জানিব পৰা মতে এই ঘটনাটো ৰাজহুৱা হোৱাৰ পিছতে নিচাসক্ত যুৱকজনক আৰক্ষীয়ে কৰায়ত্ত কৰিছে।
উল্লেখ্য যে লকডাউন শিথিল কৰাৰ পিছতে পোলেণ্ডৰ বাৰছ চিৰিয়াখানাত এজন ২৩ বছৰীয়া যুৱকে এটা ভালুকক প্ৰাণে মৰাৰ চেষ্টা চলোৱা দেখা গৈছিল।
ছ’চিয়েল মিডিয়াত শ্বেয়াৰ হোৱা ৫৩ ছেকেণ্ডৰ ভিডিঅ’টোত দেখা অনুসৰি যুৱকজনে জন্তুৰ গৰালৰ ভিতৰত প্ৰৱেশ কৰি ছাবিনা নামৰ এটা ভালুকক উত্তেজিত কৰি তুলিছিল। যেতিয়া ভালুকটোৱে যুৱকজনৰ ফালে আগবাঢ়ি আহিছিল তেতিয়া তেওঁ পানীৰে ভৰা এটা নৰ্দমাত জপিয়াই।
ইয়াৰ পিছতে ভালুকটোৱে যুৱকজনক আক্ৰমণ কৰিবৰ বাবে পানীত জাপ দিয়ে। কিন্তু পানীত ভালুকটোৱে যুৱকজনক আক্ৰমণ কৰাৰ বিপৰীতে যুৱকজনে ভালুকটোকহে পানীত ডুবাই মৰাৰ চেষ্টা চলায়। এই কথা ভিডিঅ’টোত সম্পূৰ্ণৰূপে স্পষ্ট হয়।
উল্লেখ্য যে যুৱকজন চাৰ্কাচৰ সৈতে জড়িত বুলি চিৰিয়াখানাখনৰ এজন বিষয়াই জানিবলৈ দিয়ে। ইফালে ভালুকটোও সম্পূৰ্ণ সুস্থ বুলি জানিব পৰা যায়।