ত্ৰিপুৰাত প্ৰৱঞ্চনাৰ বলি অসমৰ দুই শতাধিক যুৱক; অসম চৰকাৰক ব্যৱস্থা গ্ৰহণৰ দাবী ডি ৱাই এফ আইৰ
অসমৰ দুই শতাধিক যুৱক ত্ৰিপুৰাত প্ৰবঞ্চনাৰ বলি হৈ বন্দী অৱস্থাত দিন পাৰ কৰিবলগীয়া হোৱা ঘটনাত গভীৰ উদ্বেগ প্ৰকাশ কৰি তেওঁলোকক তৎকালে উদ্ধাৰৰ দাবী কৰিছে ভাৰতৰ গণতান্ত্ৰিক যুৱ ফেডাৰেছন (ডি ৱাই এফ আই)ৰ অসম ৰাজ্যিক কমিটিয়ে।
তিনিচুকীয়া, ডিব্ৰুগড়, যোৰহাট, শিৱসাগৰকে ধৰি পাঁচ-ছয় খন জিলাৰ প্ৰায় দুই শতাধিক যুৱকে অশোক শইকীয়া নামৰ ঠিকাদাৰ এজনৰ প্ৰৱঞ্চনাৰ বলি হৈ ত্ৰিপুৰাৰ ধৰ্মনগৰৰ পানীসাগৰত এতিয়াও আৱদ্ধ হৈ আছে।
লগতে পঢ়ক: Rape and murder! মৰিয়নীত ধর্ষণ কৰি হত্যা! অৰ্ধনগ্ন অৱস্থাত মাতৃ-কন্যাসহ পিতৃৰ মৃতদেহ উদ্ধাৰ
আৱদ্ধ যুৱক সকলৰ পক্ষৰ পৰা ডি ৱাই এফ আইক জনোৱা অনুসৰি দুমাহ আগতে অশোক শইকীয়া নামৰ ঠিকাদাৰ এজনে অ’এন জি চিৰ এটা প্লেন্টৰ কামৰ বাবে দুই শতাধিক যুৱকক ত্ৰিপুৰালৈ নিয়ে।
কিন্তু দুইমাহ পাৰ হৈ যোৱাৰ পাছত ঠিকাদাৰ শইকীয়াই শ্ৰমিক সকলক কোনো দা-দৰমহা নিদিয়াৰ লগতে খাদ্য দিয়াও বন্ধ কৰি দিয়ে।
আনকি ৰোগাক্ৰান্ত শ্ৰমিকক চিকিৎসাৰ বাবেও কোনো ব্যৱস্থা গ্ৰহণ নকৰে। এই অৱস্থাত অবৰ্ণনীয় পৰিস্থিতিৰ মাজত শ্ৰমিক সকলে দিন পাৰ কৰিবলগীয়া হৈছে।
অ’ এন জি চিৰ কামৰ নামত এজন প্ৰতিষ্ঠিত ঠিকাদাৰে অসমৰ শ্ৰমিকক কেনেকৈ প্ৰৱঞ্চনা কৰাৰ সুযোগ পালে সেয়া ডাঙৰ প্ৰশ্নৰ বিষয়। ডি ৱাই এফ আইয়ে দাবী কৰিছে অসম চৰকাৰে শীঘ্ৰে শ্ৰমিক সকলক উদ্ধাৰ কৰাৰ লগতে প্ৰপ্য ধন আদায় কৰি দিয়াৰ ব্যৱস্থা কৰক।
বিষয়টোক লৈ ডি ৱাই এফ আইৰ অসম ৰাজ্যিক কমিটিয়ে ইতিমধ্যে ত্ৰিপুৰা ৰাজ্যিক কমিটিৰ লগতো যোগাযোগ কৰিছে আৰু আৱদ্ধ যুৱক সকলক সহায় কৰিবলৈ অনুৰোধ জনাইছে।