সংসদত ভৱনত কৃষি গৱেষণা কেন্দ্ৰ স্থাপনৰ দাবী কৃষক নেতা ৰাকেশ টিকাইতৰ

কৃষক নেতা ৰাকেশ টিকাইতে কেন্দ্ৰীয় চৰকাৰক ভাৰতৰ সংসদ ভৱনৰ চৌহদত এটা কৃষি গৱেষণা কেন্দ্ৰ স্থাপন কৰিবলৈ দাবী জনাইছে।

ভাৰতীয় কিষাণ ইউনিয়নৰ নেতাগৰাকীৰ মতে এই কৃষি গৱেষণা কেন্দ্ৰই দেশৰ উৎপাদিত শস্য তথা ফচলৰ দৰ নিৰ্ধাৰণ কৰিব পাৰিব।

“চৰকাৰে ভাৱে যে স্বামীনাথনৰ প্ৰতিবেদনে নিৰ্ধাৰণ কৰি দিয়া শস্যৰ ন্যূনতম সমৰ্থন মূল্য অত্যধিক হৈছে। তেনে চৰকাৰে সংসদৰ চৌহদ কিয় কৃষি গৱেষণা কেন্দ্ৰ স্থাপন নকৰে? তাত কৃষি কৰ্ম কিয় নকৰে আৰু শস্য চপোৱাৰ পিছত লাভ আৰু ক্ষতি অনুসৰি কিয় তেওঁলোকে দৰ নিৰ্ধাৰণ নকৰে” বুলি প্ৰশ্ন কৰি টিকাইতে চৰকাৰক কটাক্ষও কৰে।

লগতে পঢ়ক : চৰকাৰে তিনি কৃষি আইন বাতিল নকৰিলে কৃষকে সংসদ ভৱন ঘেৰাও কৰিব ; ৰাকেশ টিকাইত

টিকাইতে লগতে কয় যে এতিয়াৰে পৰা ৰাজনৈতিক দলসমূহে সকলো নিৰ্বাচনতে কৃষকৰ কল্যাণৰ বাবে সকলো ধৰণৰ আঁচনি অন্তভুৰ্ক্ত আৰু কৃষকৰ সকলো সমস্য সমাধান কৰিব লাগিব।

ইফালে কেন্দ্ৰই বিতৰ্কিত তিনি কৃষি আইন বাতিল নকৰিলে অতি শীঘ্ৰেই ৪০ লাখ ট্ৰেক্টৰেৰে সংসদ ভৱন ঘেৰাও কৰা হ’ব বুলি পুনৰ সদৰী কৰে কৃষক নেতাগৰাকীয়ে।