কুঠৰীত শ্বাসৰুদ্ধকৰ পৰিৱেশত চলি আছে কাজিৰঙাৰ গঁড়ৰ উদ্ধাৰ অভিযান

বানত পৰি আশ্ৰয় বিচাৰি অহা এটা গঁড়ে আজি পুৱতি নিশাতে কুঠৰিৰ দেওচুড় অঞ্চলত ৩৭নং ৰাষ্ট্ৰীয় পথত আশ্ৰয় লয়৷

দীৰ্ঘসময় পানীৰ মাজত আবদ্ধ হৈ থকাৰ উপৰিও সাঁতুৰি আহি ৰাষ্ট্ৰীয় পথত আশ্ৰয় লোৱা ক্লান্ত গঁড়টোৱে পথৰ ওপৰতে শুই পৰে৷

পাছত ৰাষ্ট্ৰীয় পথেৰে যোৱা যান-বাহন আৰু মানুহৰ সমাগমে গঁড়টোক বিশ্ৰামত ব্যাঘাত জন্মায়৷

ঘটনাস্থলীত বনকৰ্মী উপস্থিত হৈ গঁড়টোক ৰাষ্ট্ৰীয় পথৰ পৰা আঁতৰাই বনাঞ্চললৈ নিবলৈ চেষ্টা চলায়ো ব্যৰ্থ হয়৷

পাছত ঘটনাস্থলীত কাজিৰঙাৰ সঞ্চালক পি শিৱকুমাৰ আৰু ডি এফ অ’ ৰমেশ কুমাৰ গগৈ উপস্থিত হৈ ৰাষ্ট্ৰীয় উদ্যানখনৰ বন্যপ্ৰাণী পুনৰ সংস্থাপন আৰু সংৰক্ষণ কেন্দ্ৰৰ পশু চিকিৎসক আৰু উদ্ধাৰকাৰী দলৰ সহযোগত গঁড়টোক ৰাষ্ট্ৰীয় পথৰ পৰা আঁতৰাই সুৰক্ষিত স্থানলৈ নিবলৈ চেষ্টা চলায়ো ব্যৰ্থ হয়৷

বিয়লিলৈ গঁড়টোৱে পথৰ পৰা নামি কাষৰ জলমগ্ন অঞ্চলত পানীৰ মাজতে আশ্ৰয় লয়৷

ইফালে গঁড়টোক আঁতৰাবৰ বাবে গুৱাহাটীৰ পশু চিকিৎসা বিজ্ঞান মহাবিদ্যালয়ৰ অধ্যাপক পদ্মশ্ৰী ডা৹ কুশল কোঁৱৰ শৰ্মায়ো সাতজনীয়া এটা দল লৈ সন্ধিয়া আহি ঘটনাস্থলী উপস্থিত হয়৷

ইফালে নিশা হোৱাৰ বাবে আজি দিনৰ অভিযান সামৰা হয় যদিও গঁড়টোৰ সমীপত নিৰাপত্তাৰ বাবে কটকটীয়া নিৰাপত্তাৰ ব্যৱস্থা কৰা হয়৷

এই প্ৰতিবেদনৰ সময়লৈকে গঁড়টোয়ে স্থান সলনি কৰিছে যদিও ৰাষ্ট্ৰীয় পথ কাষৰ পানীতেই আশ্ৰয় লৈ আছে৷

গঁড়টোক আৰু কিছু পশ্চিমলৈ নিব পাৰিলেই কাঠনিত প্ৰৱেশ কৰাব পৰা যাব৷ যাৰ বাবে প্ৰচেষ্টা অব্যহত ৰাখিছে পশু চিকিৎসক আৰু বনকৰ্মীৰ দলে৷

নিশাৰ ভিতৰতে গঁড়টোক বনাঞ্চললৈ নিব পৰা যাব বুলি আশা কৰিছে অভিযানকাৰী দলে৷

ব্ৰহ্মপুত্ৰৰ জলস্তৰ কিছু হ্ৰাস পোৱাৰ বাবে কাজিৰঙা ৰাষ্ট্ৰীয় উদ্যানৰ ভিতৰতো কিছু স্থৱিৰ হৈছিল বান পৰিস্থিতি৷

কিন্ত উদ্যানখনৰ ভিতৰৰ বান পৰিস্থিতিৰ জটিলতা এতিয়াও কমা নাই৷ যাৰ বাবে বহু বন্যপ্ৰাণীয়ে এতিয়াও আশ্ৰয় বিচাৰি দিহিঙে দিপাঙে ঘূৰি ফুৰিছে৷