অসমত চিতল মাছতকৈও কম দৰত বিক্ৰী হ’ল নিজ সন্তান

হয়তো উৰুকাৰ সময়ত ১০০০ টকাতকৈও অধিক দামেৰে চিতল মাছ কিনিছে আপুনি, মানুহৰ মূল্যও চিতল মাছৰে সৈতে তুলনা হ’ব পাৰেনে কেতিয়াবা! আচৰিত যেন লাগিলেও এয়াই সত্য এইখন অসমত।

জাতি-মাটি-ভেটি ৰক্ষাৰ ঢাক-ধোল বজোৱা সোণোৱাল চৰকাৰলৈ জীয়া মানৱতাৰ প্ৰত্যাহবান, আপোনাৰ চৰকাৰৰ দিনত অসমত মানুহৰ মূল্য কিমান? এহেজাৰ নে দুহেজাৰ? হয় এনে এক দুৰ্বিসহ ঘটনাই সংঘটিত হৈছে অসম মুলুকত।

ঢেকিয়াজুলিৰ অন্তৰ্গত নিজ বৰছলা গাঁৱৰ ৰাজু গোৱালা নামৰ এজন চাহ জনগোষ্ঠীৰ লোকে চৰম দ্ৰৰিদ্ৰতাৰ ওচৰত সেঁও মানি দুহেজাৰ টকাৰ বিনিময়ত বিক্ৰী কৰিলে নিজৰ দুই সন্তানক। চাৰিটা সন্তান আৰু পত্নীৰে সৈতে এখন সংসাৰ আছিল ৰাজু গোৱালাৰ। দৰিদ্ৰতাৰ বাবে উপযুক্ত চিকিৎসাৰ অভাৱত পত্নীৰ মৃত্যু হয়, তাৰ পিছত হেৰুৱাই মাটি আৰু ভেটি।

গৃহহীন ৰাজু গোৱালাৰ অৱস্থা পানীত হাঁহ নচৰা। চাৰিটা সন্তান ক্ৰমে বব নোৱাৰা বোজা হৈ পৰিল দৰিদ্ৰ পিতৃৰ বাবে। উপায়ন্তৰ হৈ অসহায় পিতৃয়ে দুই সন্তান বিশাল গোৱালাক(৭)ৰৌতাত আৰু পূজা গোৱালাক(৩)পুঠিমাৰীত দুহেজাৰ টকাৰ বিনিময়ত কোনো অচিনাকী ব্যাক্তিৰ হাতত বিক্ৰী কৰি দিয়ে। আন দুজন সন্তানো আছে বেলেগৰ ঘৰত কাম কৰা হিচাপে। এতিয়া পিতৃয়ে ইঘৰে-সিঘৰে কাম কৰি কোনোমতে পেট প্ৰৱৰ্তাইছে ।

সভ্য সমাজক পদানত কৰা এই সমগ্ৰ ঘটনা পোহৰলৈ অহাৰ পাছতে আৰক্ষীয়ে ঘটনাৰ তদন্ত আৰম্ভ কৰে। নিজৰ সন্তান বিক্ৰী কৰা পিতৃ ৰাজু গোৱালা বৰ্তমান পলাতক অৱস্থাত। উদ্ধাৰ হবনে পন্যৰ দৰত বিক্ৰী হোৱা দুই শিশু। চৰকাৰৰ উন্নয়ন কেবল ভাষণতে হৈছে নে সঁচাকৈয়ে এই উন্নয়নে চাহ জনগোষ্ঠীক চুব পাৰিছে সেয়া এতিয়া এক মূল্যহীন প্ৰশ্ন।