ছাত্ৰনেতাৰ পৰা সক্ৰিয় ৰাজনীতিলৈ; আনুষ্ঠানিকভাৱে য়ুপিপিএলত যোগদান প্ৰমোদ বড়োৰ
নিখিল বড়ো ছাত্ৰ সন্থা (আবছু)ৰ প্ৰাক্তন সভাপতি প্ৰমোদ বড়োৱে চিৰাং জিলাৰ বিজনীত শুকুৰবাৰে সন্ধিয়া আনুষ্ঠানিকভাৱে য়ুপিপিএলত যোগদান কৰে।
বিটিচি নিৰ্বাচনৰ প্ৰাকক্ষণত সক্ৰিয় ৰাজনীতিত প্ৰৱেশ কৰা প্ৰমোদ বড়োক য়ুপিপিএলত যোগদান কৰাৰ পাছতে দলৰ কাৰ্য্যকৰী সভাপতি হিচাপে নিযুক্তি দিয়া হয়।
প্ৰাক্তন ৰাজ্যসভাৰ সাংসদ উৰ্খাও গৌৰাং ব্ৰহ্মই পূৰ্বতে সদ্য বিদায়ী আবছু সভাপতি গৰাকীক য়ুপিপিএলত যোগদানৰ বাবে আহ্বান জনাইছিল।
প্ৰমোদ বড়োৰ লগতে বহুকেইগৰাকী আবছুৰ কৰ্মকৰ্তাই শুকুৰবাৰে আনুষ্ঠানিকভাৱে য়ুপিপিএলত যোগদান কৰে।
উল্লেখযোগ্য যে, সমাগত বিটিচি নিৰ্বাচনত হাগ্ৰামা মহিলাৰী নেতৃত্বাধীন বিপিএফ আৰু বিজেপি মিত্ৰজোটৰ সন্মুখত উৰ্খাও গৌৰাং ব্ৰহ্ম নেতৃত্বাধীন য়ুপিপিএলে তীব্ৰ প্ৰত্যাহ্বান সৃষ্টি কৰিছে।
ভাৰতীয় জনতা পাৰ্টিয়ে আগন্তুক বিটিচি নিৰ্বাচনত তেওঁলোকৰ মিত্ৰ দল বিপিএফ হ’ব নে য়ুপিপিএল হ’ব সেই সম্বন্ধে এতিয়ালৈ স্পষ্ট কৰা নায়।
জানিব পৰা মতে, বিজেপিয়ে বিটিচিৰ চাৰিখন জিলা কোকৰাঝাৰ, চিৰাং, ওদালগুৰি আৰু বাক্সা জিলাৰ তৃণমূল কৰ্মীসকলৰ সৈতে পৰ্যালোচনা চলাই এই সম্পৰ্কত সিদ্ধান্ত গ্ৰহণ কৰিব।
বিজনীত অনুষ্ঠিত দলীয় সভাত য়ুপিপিএলত যোগদান কৰা প্ৰমোদ বড়োক বিপুল আদৰণি জনোৱা হয়।
‘মই কোনোধৰণৰ ৰাজনৈতিক স্বাৰ্থৰ বাবে ৰাজনৈতিক দললৈ অহা নাই মোৰ একমাত্ৰ উদ্দেশ্য হৈছে বড়োলেণ্ডৰ সকলো স্তৰৰ লোকৰ সৰ্বাংগীন উন্নয়ন নিশ্চিত কৰা,’ প্ৰমোদ বড়োৱে কয়।
আনহাতে, বৰ্তমানলৈ কোনো দলৰ সৈতে তেওঁলোকৰ দলৰ মিত্ৰতা হোৱা নাই বুলি উল্লেখ কৰি দলীয় সন্মিলনত এই সম্পৰ্কত সিদ্ধান্ত গ্ৰহণ কৰা হ’ব বুলিও বড়োৱে মত প্ৰকাশ কৰে।
‘‘আমাৰ আত্মাত ৰাজনীতি সোমাই থকা নাই আমাৰ মূল লক্ষ্য হ’ল বিটিআৰ চুক্তিত আখৰেৰে লিপিবদ্ধ হৈ থকা কথাবোৰক বাস্তৱ ৰূপ দিয়া,’’ প্ৰমোদ বড়োৱে লগতে কয়।
আনহাতে, য়ুপিপিএল প্ৰধান উৰ্খাও গৌৰাং ব্ৰহ্মই প্ৰমোদ বড়োৰ দলত যোগদানে য়পিপিএলৰ শক্তি বৃদ্ধি কৰিলে বুলি মন্তব্য কৰি তেওঁক দলৰ কাৰ্য্যকৰী সভাপতিৰ দায়িত্ব অৰ্পন কৰা হৈছে বুলি কয়।