গৌতম ৰয় এ পি এছ চিৰ কেলেংকাৰিৰ মূল নায়ক: তৰুণ গগৈ

‘’গৌতম ৰয় এপিএছচিৰ কেলেংকাৰিৰ মূল নায়ক।‘’ নতুন মন্ত্ৰী আবাসত প্ৰাক্তন মুখ্য মন্ত্ৰী তৰুণ গগৈয়ে শনিবাৰে এক সংবাদমেলত এইদৰে কয়।

তেওঁ কয়, ‘’গৌতম ৰয়ে এগৰাকী বঙালী সম্প্ৰদায়ৰ লোকক অধক্ষক নিযুক্তি দিবলৈ কৈছিল।‘’

‘’যদি এ পি এছ চিৰ সঠিক তদন্ত হৈছে তেন্তে ৰাকেশ পালৰ ভায়েকক গ্ৰেপ্তাৰ কৰা নাই কিয়?’’-এইদৰে প্ৰশ্ন কৰে প্ৰাক্তন মুখ্য মন্ত্ৰীগৰাকীয়ে।

নিবনুৱা সমস্যা সন্দৰ্ভত গগৈয়ে কয় যে ২০১৪ ত মোদীয়ে ২ কোটি যুৱকক চাকৰি দিম বুলি আশ্বাস দিছিল। কিন্তু নিবনুৱা সমস্যাৰ প্ৰতি মোদীয়ে এতিয়া আওকাণ কৰিছে।

তেওঁ কয়, ‘’দেশত অৰ্থনৈতিক দুৰ্যোগে দেখা দিছে। আগতে এনে দুৰ্যোগ হোৱা নাছিল।‘’

গগৈয়ে লগতে কয়, ‘’মানুহক ডাইভাৰ্ট কৰাত মোদী পাকৈত। মানুহৰ মন ভুলোৱা এওৱেঁই প্ৰথম প্ৰধানমন্ত্ৰী।‘’

‘’মোদীৰ দিনত অৰ্থনৈতিক গতিটো একেবাৰে কমি গৈছে। তেওঁ আকৌ হাই জাম্পৰ কথা কয়। প্ৰধান মন্ত্ৰীয়ে দেশৰ বিকৃত ছবিখন দেখুৱাবলৈ গৈ মানুহৰ মাজত বিভ্ৰান্তিৰ সৃষ্টি কৰিছে,’’-গগৈয়ে কয়।

তাৎপৰ্যপূৰ্ভাৱে,গগৈয়ে কয় যে জনসংখ্যা বেছিকৈ নিয়ন্ত্ৰণ হ’লেও বেয়া। শিক্ষা বৃদ্ধি পালে জনসংখ্যা কমিবই। মানুহৰ জীৱিকা বেছি হ’লে বেছি সন্তান জন্ম নিদিয়ে, দুখীয়া সকলেহে বেছিকৈ জন্ম দিয়ে।

প্ৰাক্তন মুখ্য মন্ত্ৰীগৰাকীয়ে বানপানী সমস্যা চৰকাৰে গুৰুত্ব সহকাৰে লোৱা নাই বুলি উল্লেখ কৰি কয় যে এতিয়া গোটেই ৰাজ্যতে বানপানী হ’বলৈ ধৰিলে। চৰকাৰে এই সমস্যা গুৰুত্ব সহকাৰে লোৱা নাই। প্ৰধান মন্ত্ৰীয়ে এতিয়ালৈকে বানপীড়িত এলেকা ভ্ৰমণ কৰা দেখা নাই।

আনহাতে, কাশ্মীৰ সন্দৰ্ভত গগৈয়ে প্ৰশ্ন কৰে যে কাশ্মীৰৰ ভালৰ কাৰণে যদি কৰিছে তেন্তে তাৰ জনসাধাৰণক কিয় বুজোৱা নাই? কিয় ইমান লোকক গ্ৰেপ্তাৰ কৰিছে?

‘’নাগালেণ্ডত ১৪ আগষ্টত নাগা স্বাধীনতা দিৱস পাতিব পাৰিলে। এয়াটো আটাইতকৈ বেয়া আৰু অশনি সংকেত। অলফাইয়ো সাহস কৰা নাই এতিয়ালৈকে। মইতো নাগালেণ্ডত আগেয়ে এনেকৈ আগতীয়াকৈ পতাকা উৰুৱা দেখা নাই,’’-গগৈয়ে কয়।

প্ৰাক্তন মুখ্য মন্ত্ৰীগৰাকীয়ে লগতে প্ৰশ্ন কৰে, ‘’নাগালেণ্ডৰ ক্ষেত্ৰত নেডাই এতিয়া কি কৰিছে?  হিমন্ত বিশ্বই কি কৰি থাকে?’’

আক্ৰমমাত্মক গগৈয়ে লগতে কয়, ‘’ছিণ্ডিকেট চলিয়েই আছে। কেলেংকাৰি ৰাজ চলি আছে, চলি থাকিব, আৰু বাঢ়িব। কেলেংকাৰিৰ মানুহবোৰক আদৰি লৈ আছে। দুৰ্নীতিমুক্তও নহয়, বিদেশী মুক্তও নহয়, এই চৰকাৰৰ দিনত একোৱেই নহয়।‘’

ইপিনে,গগৈয়ে সংবাদ মাধ্যমৰ প্ৰতি চৰকাৰৰ ৰোষৰ কথা উল্লেখ কৰি কয় যে  ‘’পেপাৰত লিখিবলৈয়ো আজিকালি সাংবাদিকে ভয় কৰা হৈছে। যেতিয়াই তেতিয়া গোচৰ জাপি দিয়ে। আমাৰ দিনতো আমাৰ বিৰুদ্ধে বেয়াকৈ লিখিছিল। আমিটো একো আইনৰ ব্যৱস্থা লোৱা নাছিলো।‘’