বিস্ফোৰণে জোকাৰিলে পাকিস্তানঃ প্ৰাক্তন প্ৰধানমন্ত্ৰীৰ দলীয় তিনি সতীৰ্থসহ চাৰিজন নিহত

এক ভয়াৱহ বিস্ফোৰণে মঙলবাৰে জোকাৰি গ’ল পাকিস্তান। এই বিস্ফোৰণত প্ৰাক্তন প্ৰধানমন্ত্ৰী ইমৰাণ খানৰ দল পাকিস্তান তেহৰিক-ই-ইনছাফৰ তিনিজন সদস্যকে ধৰি চাৰিজন লোক নিহত হয়।

দেশখনৰ বেলুচিস্তান প্ৰদেশত সংঘটিত হৈছে এই বোমা বিস্ফোৰণ। উল্লেখ্য যে মঙলবাৰে পাকিস্তানৰ এক আদালতে ইমৰাণ খানক দেশৰ গোপনীয়তা ফাদিল কৰাৰ অপৰাধত ১০ বছৰৰ কাৰাদণ্ডৰ শাস্তি দিয়ে।

আদালতৰ এই শাস্তি ঘোষণাৰ কিছু ঘণ্টাৰ পাছতে দলটোৱে বেলুচিস্তান প্ৰদেশত এক ৰেলীৰ আয়োজন কৰিছিল। এই ৰেলীৰ সময়ত সংঘটিত হয় এই বিস্ফোৰণ।

পাকিস্তান তেহৰিক-ই-ইনছাফৰ বেলুচিস্তানৰ প্ৰাদেশিক সাধাৰণ সম্পাদক ছালাৰ খান কাকাৰে সদৰী কৰা মতে বিস্ফোৰণত তেহৰিক-ই-ইনছাফৰ তিনিজন কৰ্মী শ্বহীদ আৰু ৭জন আহত হয়।

প্ৰকাশিত খবৰ অনুসৰি আহত লোকসকলক তাৎক্ষণিকভাৱে চিকিৎসালয়লৈ লৈ যোৱা হয়। তেওঁলোকৰ অধিকাংশৰে অৱস্থা সংকটজনক আৰু মৃত্যুৰ সংখ্যা বৃদ্ধি পাব পাৰে বুলি চিকিৎসালয় কৰ্তৃপক্ষই সদৰী কৰিছে।

ছালাৰ খান কাকাৰে এই ঘটনাক হৃদয়বিদাৰক বুলি অভিহিত কৰি বিস্ফোৰণক তীব্ৰ গৰিহণা জনায় আৰু পিটিআই কৰ্মীৰ পৰিৱৰ্তে সন্ত্ৰাসবাদীক দমন কৰাত মনোযোগ দিবলৈ চৰকাৰক দাবী জনায়।

উল্লেখ্য যে অহা ৮ ফেব্ৰুৱাৰীত দেশখনত সাধাৰণ নিৰ্বাচন অনুষ্ঠিত হ’ব। নিৰ্বাচনৰ মাত্ৰ ৯ দিন পূৰ্বে ইমৰাণ খানৰ দল পাকিস্তান তেহৰিক-ই-ইনছাফৰ ৰেলীত সংঘটিত এই বিস্ফোৰণক লৈ দলটোৱে উষ্মা প্ৰকাশ কৰিছে।