দুটাকৈ এনকাউণ্টাৰত নিহত ৪ সন্ত্ৰাসবাদী, শ্বহীদ ২ সেনা জোৱান

সেনা-সন্ত্ৰাসবাদীৰ নতুন মুখামুখি সংঘৰ্ষত কঁপি উঠিছে কাশ্মীৰ উপত্যকা। জম্মু-কাশ্মীৰৰ কুলগাম জিলাত ভাৰতীয় নিৰাপত্তা বাহিনীয়ে এক বৃহৎ অভিযান চলায়।

উপত্যকাৰ পৰা সন্ত্ৰাসবাদ নিৰ্মূল কৰাৰ প্ৰতিশ্ৰুতি দিয়া ভাৰতীয় সেনাই স্থানীয় আৰক্ষীৰ লগতে তথ্যৰ ভিত্তিত ব্যৱস্থা গ্ৰহণ কৰিছে। জানিব পৰা মতে, এই মুখামুখি সংঘৰ্ষ কুলগামৰ দুটা স্থানত সংঘটিত হৈছিল, য’ত সেনাই যথেষ্ট সফলতা লাভ কৰিছে।

এই এনকাউণ্টাৰত সেনাই ৪ জন সন্ত্ৰাসবাদীক হত্যা কৰে। যদিও দেশ মাতৃক ৰক্ষা কৰাৰ সময়ত সন্ত্ৰাসবাদীৰ হাতত ২ জন সেনা জোৱান শ্বহীদ হোৱাৰ খবৰ পোৱা গৈছে। ইফালে এই ঘটনাৰ কেইঘণ্টামানৰ পাছতো দেওবাৰে পুৱাৰে পৰা সেনাবাহিনী আক্ৰমণাত্মক ৰূপত আছে। কুলগামত পুৱাই আৰম্ভ হয় নিৰাপত্তাৰক্ষীৰ তালাচী অভিযান।

কুলগামৰ ফ্ৰিছাল চিনিগাম অঞ্চল ঘেৰি লোৱা আৰু তালাচী অভিযান আৰম্ভ হোৱাৰ পৰাই সন্ত্ৰাসবাদীৰ সৈতে মুখামুখি সংঘৰ্ষ হোৱা বুলি বিষয়াসকলে জনায়। তেওঁ কয় যে এই এনকাউণ্টাৰত এতিয়ালৈকে চাৰিজন সন্ত্ৰাসবাদীৰ মৃত্যু হৈছে। ঘটনাস্থলীৰ ড্ৰ’ন ফুটেজত চাৰিটা মৃতদেহ মাটিত পৰি থকা দেখা গৈছে যদিও বিষয়াসকলে গুলীচালনা অব্যাহত থকাৰ কথা জনায়।

ইতিমধ্যে কাশ্মীৰ আৰক্ষীৰ আই জি ভি কে সিঙে সেই স্থান পৰিদৰ্শন কৰিছে। এই অভিযান অব্যাহত থাকিব বুলি সেনাই জানিবলৈ দিয়ে।

এই এনকাউণ্টাৰৰ স্থান শ্ৰীনগৰ-জম্মু ৰাষ্ট্ৰীয় ঘাইপথৰ ওচৰত নহয়, জিলাখনৰ ভিতৰত বুলি জানিব পৰা গৈছে। ইয়াৰ পূৰ্বে কুলগাম জিলাৰ মডেৰগাম গাঁৱত নিৰাপত্তা বাহিনী আৰু উগ্ৰপন্থীৰ মাজত সংঘৰ্ষ সংঘটিত হৈছিল। তেওঁ জনায়, এই এনকাউণ্টাৰত এজন সেনা জোৱানৰ মৃত্যু হয়।