অজন্তা নেওগৰ বিজেপিত যোগদানে উজনি অসমৰ লগতে গোলাঘাটতো কংগ্ৰেছত প্ৰভাৱ নেপেলায় : গৌৰৱ গগৈ

‘অজন্তা নেওগে বিজেপিত যোগদানে উজনি অসমৰ লগতে গোলাঘাটতো কংগ্ৰেছত প্ৰভাৱ নপৰে,’ ২০২১ বৰ্ষৰ প্ৰথম দিনটোত ৰাজীৱ ভৱনত সাংবাদিকৰে সৈতে মত বিনিময় অনুষ্ঠান অনুষ্ঠিত কৰি এই দাবী কৰিছে যুৱ সাংসদ গৌৰৱ গগৈয়ে।

‘‘বিজেপিত তেওঁ মৰম চেনেহ লাভ কৰিম বুলি ভবাটো ভুল চিন্তা। তেওঁৰ সৈতে বিজেপিত যোগদান কৰাসকলে যেতিয়া তেওঁলোকৰ মৰ্যদা নাইকিয়া হোৱা বুলি উপলব্ধি কৰিব তেতিয়া পুনৰ উভটি আহিব’’ গৌৰৱ গগৈয়ে সংবাদমেল সম্বোধন কৰি এইদৰে লগতে কয়।

আনহাতে,  ২০২০ সকলোৰে বাবে এটা জটিল বৰ্ষ আছিল বুলি সদৰী কৰি গৌৰৱে লগতে কয় ‘সকলো জনসাধাৰণ বিভিন্ন সমস্যা বা বিপদৰ সন্মুখীন হৈছিল। হাজাৰ হাজাৰ শ্ৰমিক কেৰালা, মুম্বাই, তামিলনাডুৰ পৰা উভটি আহিল। অতি বেয়া অৱস্থাত তেওঁলোক উভটি আহিল যদিও তেওঁলোকে অসমলৈ আহি সংস্থাপন লাভ নকৰিলে। যাৰ ফলত পুনৰ বহিঃৰাজ্যলৈ কৰ্ম সংস্থাপন বিচাৰি উভটিবলগীয়া হ’ল।’

‘নৱপ্ৰজন্মৰ ভৱিষ্যতক লৈ এক ডাঙৰ চিন্তা হৈছে। নিৱনুৱা সমস্যাৰ লগতে মুল্যবৃদ্ধিৰ সমস্যাইয়ো সকলোকে চিন্তাত পেলাইছে। অসমবাসী ৰাইজে যিধৰণে ৰাজ্য চৰকাৰৰ পৰা সহায় লাভ কৰিছিল সেয়া বৰ্তমানলৈকে লাভ কৰা নাই।’ গৌৰৱে পুনৰ কয়।

সকলো ৰাইজৰ কংগ্ৰেছৰ বাবে ২০২১-লৈ আশা কৰি আছে বুলি দাবী কৰি গৌৰৱে কয় ‘ৰাইজৰ মুখৰ হেৰাই যোৱা হাঁহি পুনৰ কংগ্ৰেছে ঘুৰাই আনিব।’