চেমচন পৰৱৰ্তী কোনো হোৱাৰ প্ৰয়োজন নাই; থাৰুৰৰ মন্তব্যৰ প্ৰত্যুত্তৰ গৌতম গম্ভীৰৰ
কংগ্ৰেছী সাংসদ শশী থাৰুৰে সঞ্জু চেমচনক পৰৱৰ্তী মহেন্দ্ৰ সিং ধোনী হ’বলৈ গৈ আছে বুলি কৰা মন্তব্য সন্দৰ্ভত মত প্ৰকাশ কৰিছে ভাৰতীয় ক্ৰিকেট দলৰ প্ৰাক্তন তাৰকা অপেনিং বেটছমেন গৌতম গম্ভীৰে।
শশী থাৰুৰ মন্তব্য সন্দৰ্ভত মত ব্যক্ত কৰি গম্ভীৰে কয় যে সঞ্জু চেমচন পৰৱৰ্তী কোনো হোৱাৰ প্ৰয়োজন নায়।
”সঞ্জু চেমচন ভাৰতীয় ক্ৰিকেটৰ সঞ্জু চেমচন হোৱা উচিত,” গৌতম গম্ভীৰে এইদৰে কয়।
উল্লেখযোগ্য যে, চলিত আই পি এলত সঞ্জু চেমচনে বৰ্তমানলৈ দুৰ্দান্ত প্ৰদৰ্শন আগবঢ়াই থকাৰ পাছতে জেষ্ঠ কংগ্ৰেছী সাংসদ শশী থাৰুৰে চেমচন সন্দৰ্ভত মত ব্যক্ত কৰি কৈছিল যে তেওঁ চৈধ্য বছৰ বয়সতে চেমচনক লগ কৰি চেমচন ভাৰতীয় ক্ৰিকেটৰ পৰৱৰ্তী মহেন্দ্ৰ সিং ধোনী হ’বলৈ গৈ আছে বুলি কৈছিল।
সঞ্জু চেমচনে য়ু এ ইত আৰম্ভ হোৱা চলিত বৰ্ষৰ আই পি এলত বৰ্তমানলৈ দুটা ইনিংছত ১৫৯ ৰান সংগ্ৰহ কৰিছে।