গুৱাহাটীৰ বৰঝাৰ বিমান বন্দৰত ২ কোটি টকাৰ সোণসহ যাত্ৰী আটক

গুৱাহাটীৰ বৰঝাৰস্থিত লোকপ্ৰিয় গোপীনাথ বৰদলৈ আন্তঃৰাষ্ট্ৰীয় বিমান বন্দৰত আজি বৃহৎ পৰিমাণৰ সোণসহ এগৰাকী যাত্ৰীক আটক কৰা ঘটনাই চাঞ্চল্যৰ সৃষ্টি কৰিছে। এয়াৰ ইণ্ডিয়া বিমানৰ এগৰাকী যাত্ৰীৰ পৰা জব্দ কৰা উক্ত সোণখিনিৰ ওজন হ’ব প্ৰায় ৬ কিলোগ্ৰাম।

প্ৰাপ্ত তথ্য মতে, কেন্দ্ৰীয় ঔদ্যোগীক সুৰক্ষা বাহিনী চমুকৈ চি আই এছ এফে চলাই থকা নিয়মীয়া তালাচীৰ সময়ত এয়াৰ ইণ্ডিয়াৰ উক্ত যা্ত্ৰী গৰাকীৰ পৰা ২ কোটি টকা মূল্যৰ সোণখিনি জব্দ কৰে।

আটকাধীন যাত্ৰীজনক মিজোৰামৰ আইজলৰ লালথিথাল লিয়ানা বুলি চিনাক্ত কৰা হৈছে। চি আই এছ এফৰ সূত্ৰই জানিবলৈ দিয়া মতে আইজলৰ পৰা গুৱাহাটী অহাৰ পথত এগৰাকী ব্যক্তিয়ে তেওঁৰ হাতত সোণখিনি গতাই দিছিল। আইজলৰ পৰা এখন ছুপাৰ বাছেৰে তেওঁ গুৱাহাটী আই এছ বি টিত উপস্থিত হৈছিল।

চি আই এছ এফৰ সূত্ৰটোৱে লগতে জনাই যে ধৃত লোকজনৰ গুৱাহাটীৰ পৰা সোণখিনি কলকাতালৈ নিয়াৰ পৰিকল্পনা আছিল। ঘটনা সম্পৰ্কত আৰু অধিক তথ্যৰ বাবে তদন্ত চলাই থকা হৈছে বুলি জানিব পৰা গৈছে।