অমানুষিক উৎপীড়ন কৰি হত্যা গ্ৰেট ইণ্ডিয়ান হৰ্ণবিলক: তিনিজনক গ্ৰেপ্তাৰ কৰিলে আৰক্ষীয়ে

জীৱশ্ৰেষ্ঠ বুলি দাম্ভিকতাৰে দাবী কৰা মানুহে আনু জীৱ-জন্তুৰ প্ৰতি সৃষ্টি কৰা ভাবুকিৰ পৰিৱেশ সাম্প্ৰতিক সময়ত এক চিন্তাৰ বিষয়। মানুহৰ অবিবেচকী কাণ্ডৰ ফলত প্ৰকৃতিত বসবাসৰ আশংকাত ভুগিবলগীয়া হৈছে অন্য জীৱকুলে।

এনে জীৱ-জন্তুসমূহক নিজৰ ক্ষন্তেকীয়া আনন্দৰ বাবে মানুহে কৰা অমানুষিক অত্যাচাৰৰ দৃশ্য তেনেই সাধাৰণ কথা। কিন্তু জীৱ-জন্তুৰ প্ৰতি এনে ৰুক্ষ ব্যৱহাৰৰ বাবে যে আইনীভাৱে শাস্তিৰ সন্মুখীন হ’ব পাৰে এই বিষয়েও বহু লোকেই অজ্ঞ নহয়।

শেহতীয়াকৈ, বুধবাৰে ছচিয়েল মিডিয়াত এটা ভিডিঅ’ ভাইৰেল হৈ পৰিছিল। এই ভিডিঅ’টোত এটা গ্ৰেট ইণ্ডিয়ান হৰ্ণবিলক কিছু লোকে অমানুষিক উৎপীড়ন কৰি হত্যা কৰা দেখিবলৈ পোৱা গৈছিল।

প্ৰচাৰিত ভিডিঅ’টোত নাগালেণ্ডৰ ৱোখা জিলাৰ এই স্থানীয় কিছু লোকে হৰ্ণবিলটোক আগুৰি থকাৰ বিপৰীতে এজন লোকক ভৰিৰে চৰাইটোৰ ডিঙিত আঘাত কৰা তথা হেঁচি গচকি দিয়া দেখিবলৈ পোৱা গৈছিল।

ভিডিঅ’টো ভাইৰেল হৈ পৰাৰ পিছত ই তীব্ৰ প্ৰতিক্ৰিয়াৰ সৃষ্টি কৰে। চৰাইটোক এনেদৰে উৎপীড়ন চলোৱা লোকসকলক সমালোচনাৰে থকা-সৰকা কৰে পশুপ্ৰেমী ৰাইজৰ লগতে পশু অধিকাৰ কৰ্মীসকলে।

এনে বিৰূপ প্ৰতিক্ৰিয়াৰ সৃষ্টি হোৱাৰ পাছতে নাগালেণ্ড আৰক্ষীয়ে বন্যপ্ৰাণী আৰু অস্ত্ৰ আইনৰ অধীনত চৰাইটোক অত্যাচাৰ আৰু হত্যা কৰাৰ অভিযোগত তিনিজন লোকক গ্ৰেপ্তাৰ কৰে।

নিহত হৰ্ণবিলটোৰ শৰীৰৰ কিছু অংশ উদ্ধাৰ কৰাৰ লগতে আৰক্ষীয়ে হৰ্ণবিল হত্যাত ব্যৱহৃত পৰম্পৰাগত ঘাতক অস্ত্ৰও জব্দ কৰে। আনহাতে অভিযুক্ত তিনিজনৰ বিৰুদ্ধে জামিনবিহীন গোচৰ ৰুজু কৰা হৈছে বুলি জানিব পৰা গৈছে।

উল্লেখ্য যে গ্ৰেট ইণ্ডিয়ান হৰ্ণবিলক ২০১৮ চনৰ পৰা ‘IUCN Red List’ত অসুৰক্ষিত প্ৰাণী হিচাপে তালিকাভুক্ত কৰা হৈছে।