গুজৰাট সমাচাৰৰ স্বত্বাধিকাৰীক গ্ৰেপ্তাৰ: স্বতন্ত্ৰ সংবাদ মাধ্যমৰ ওপৰত আক্ৰমণৰ অভিযোগ

গুজৰাটৰ প্ৰভাৱশালী দৈনিক গুজৰাট সমাচাৰৰ সহ স্বত্তাধিকাৰী বাহুবলী শ্বাহক বৃহস্পতিবাৰে নিশা আৰ্থিক দুৰ্নীতিৰ অভিযোগত গ্ৰেপ্তাৰ কৰে বলবৎকাৰী সঞ্চালকালয়ে (ইডি)। ইয়াৰ পূৰ্বে আয়কৰ বিভাগে শ্বাহ পৰিয়ালৰ বিভিন্ন সম্পত্তিত তালাচী চলাইছিল।

তালাচীৰ লগে লগে চৰকাৰে গুজৰাট সমাচাৰৰ এক্স একাউণ্টো ব্লক কৰে। পেহেলগাম সন্ত্ৰাসবাদী আক্ৰমণৰ পিছত প্ৰকাশিত সমালোচনাত্মক সম্পাদকীয়ক কেন্দ্ৰ কৰিয়েই এই পদক্ষেপ লোৱাৰ অভিযোগ উত্থাপন হৈছে।

গুজৰাট কংগ্ৰেছৰ সভাপতি শক্তিসিংহ গোহিলে এই গ্ৰেপ্তাৰক “ৰাজনৈতিক প্ৰতিশোধ” বুলি অভিহিত কৰিছে। তেওঁৰ মতে, “মুক্তভাৱে নিজৰ মতামত প্ৰকাশ কৰাৰ বাবে গুজৰাট সমাচাৰ বিজেপিৰ ৰোষত পৰিছে।” একেটা ধাৰাত আম আদমি পাৰ্টিৰ গুজৰাটৰ সভাপতি ইছুদন গাধৱীয়ে কয় যে, “এইটো ৰাজ্যৰ সাংবাদিকতাক স্তব্ধ কৰাৰ প্ৰয়াস”।

প্ৰবীণ সাংবাদিক শীলা ভাটে জনোৱা মতে, গ্ৰেপ্তাৰৰ পিছত শ্বাহৰ শাৰীৰিক অৱস্থাৰ অৱনতি ঘটাত তেওঁক জাইডাছ হাস্পতাললৈ স্থানান্তৰ কৰা হয়। পিছত স্বাস্থ্যজনিত কাৰণত তেওঁৰ অন্তৰ্ৱতীকালীন জামিন মঞ্জুৰ কৰা হয়।

উল্লেখ্য যে শেহতীয়াকৈ উচ্চতম ন্যায়ালয়ে ইডিৰ কাম-কাজক লৈ প্ৰশ্ন উত্থাপন কৰিছিল। ২০১৪ চনৰ পৰা ২০২৪ চনলৈ ৫২৯৭টা গোচৰৰ ভিতৰত মাত্ৰ ৪০টা গোচৰতহে দোষী সাব্যস্ত হোৱাৰ পিছতে কেন্দ্ৰীয় সংস্থাটোৰ নিৰপেক্ষতাক লৈ পুনৰ বিতৰ্কৰ সূচনা হৈছে।

ইডিয়ে এতিয়াও শ্বাহৰ বিৰুদ্ধে বিশেষ অভিযোগ দাখিল কৰা নাই। অৱশ্যে এই ঘটনাই সংবাদ মাধ্যমৰ স্বাধীনতা আৰু কেন্দ্ৰীয় সংস্থাসমূহৰ অপব্যৱহাৰক লৈ পুনৰ উদ্বেগৰ সৃষ্টি কৰিছে।