মাত্ৰ ৫ চেকেণ্ডতে অসমৰ খেলুৱৈৰ হাতত ধৰাশায়ী বাংলাদেশৰ ব্লেক বেল্টধাৰী

গুৱাহাটীস্থ দাষ্টবি এম এম এ (Dastbi MMA)ৰ প্ৰশিক্ষণপ্ৰাপ্ত অভিজিৎ গগৈয়ে নৱবৰ্ষৰ প্ৰাকক্ষণত ৰাজ্যবাসীৰ বাবে কঢ়িয়াই আনিছে সুখবৰ। অল ইণ্ডিয়া কিঅ’কুছিন কাৰাটে এছ’চিয়েশ্যনৰ উদ্যোগত পশ্চিমবংগত আয়োজন কৰা ইণ্টাৰনেশ্যনেল ফ্ৰেইণ্ডশ্বিপ কাপ ২০১৮ত অসমৰ এইগৰাকী খেলুৱৈয়ে ভাৰতৰ হৈ প্ৰতিদ্বন্দ্বিতা কৰি তৃতীয়স্থান দখল কৰিবলৈ সক্ষম হয়।

অৰেঞ্জ বেল্টধাৰী অভিজিৎ গগৈয়ে প্ৰতিযোগিতাৰ তৃতীয় স্থানৰ বাবে ব্লেকবেল্টধাৰী বাংলাদেশৰ এজন খেলুৱৈৰ মুখামুখি হয়। মেচখনত গগৈয়ে মাত্ৰ ৫ চেকেণ্ডতে প্ৰতিপক্ষৰ বাংলাদেশৰ খেলুৱৈজনক ধৰাশায়ী কৰি তৃতীয়স্থান অধিকাৰ কৰে। আনহাতে কোৰিয়া আৰু নেপালৰ খেলুৱৈয়ে ক্ৰমে প্ৰথম আৰু দ্বিতীয়স্থান দখল কৰে।

১৮ বছৰীয়া অভিজিৎ গগৈয়ে গুৱাহাটীস্থ দাষ্টবি এম এম এৰ ছেনছেই আংকিম কাশ্যপ শৰ্মাৰ অধীনত প্ৰশিক্ষণ গ্ৰহণ কৰি আছে। প্ৰতিযোগিতাৰ তৃতীয়স্থান অধিকাৰ কৰি গগৈয়ে কয়, ‘মোৰ এই সাফল্যৰ বাবে প্ৰশিক্ষক আৰু দাষ্টিৰ সকলো সদস্যকে ধন্যবাদ জ্ঞাপন কৰিছো। সকলো সময়তে প্ৰশিক্ষকগৰাকীয়ে মোক সাহস তথা অনুপ্ৰেৰণা যোগাই আহিছে। তেওঁৰ বাবেই এতিয়া আমি বিভিন্ন পৰ্যায়ৰ প্ৰতিযোগিতাত অসম তথা দেশৰ হৈ অংশগ্ৰহণ কৰিবলৈ সুবিধা পাইছো। মোৰ মা-দেউতাৰ লগতে পৰিয়ালৰ সকলো লোকেই এই ক্ষেত্ৰত সম্পূৰ্ণ সহযোগিতা আগবঢ়াই আহিছে’।

উল্লেখ্য যে গুৱাহাটীৰ বেলতলা আৰু গীতানগৰত দাষ্টবি এম এম এ প্ৰশিক্ষণৰ দুটা কেন্দ্ৰ আছে। দুয়োটা কেন্দ্ৰতে মাৰ্টিয়েল আৰ্টছৰ দুগৰাকীকৈ অভিজ্ঞ প্ৰশিক্ষকৰ দ্বাৰা প্ৰশিক্ষণ প্ৰদান কৰা হয়। দাষ্টবি এম এম এৰ প্ৰশিক্ষক আংকিম কাশ্যপ শৰ্মা আৰু ইন্দ্ৰাণী চক্ৰৱৰ্তিৰ এটাই সপোন উত্তৰ-পূবৰ ফাইটাৰ্ছক এখন ভাল মঞ্চ প্ৰদান কৰা।