ভূটানত নতুন চৰকাৰ! হাৰ্ভাৰ্ডকে ধৰি একাধিক বিদেশী ডিগ্ৰীধাৰী চুবুৰীয়া ৰাষ্ট্ৰৰ পৰৱৰ্তী প্ৰধানমন্ত্ৰী

সদ্য সমাপ্ত সাধাৰণ নিৰ্বাচনত ভূটানৰ প্ৰাক্তন প্ৰধানমন্ত্ৰী শ্বেৰিং ট’বগেৰ দলে সংসদৰ প্ৰায় দুই তৃতীয়াংশ আসন লাভ কৰি জয়লাভ কৰে। ২০২৪ চনৰ ৰাষ্ট্ৰীয় সংসদৰ সাধাৰণ নিৰ্বাচনত ট’বগেৰ পিপলছ ডেম’ক্ৰেটিক পাৰ্টিয়ে (পিডিপি) ৩০খন আসনত জয়লাভ কৰাৰ বিপৰীতে বাকী ১৭খন আসনত ভূটান টেণ্ডেল পাৰ্টিয়ে (বিটিপি) জয়লাভ কৰে।

দ্বিতীয়বাৰৰ বাবে ভূটানৰ প্ৰধানমন্ত্ৰী হোৱাৰ পথত শ্বেৰিং ট’বগে। বর্তমানৰ ৰজাৰ ৰাজত্ব আৰম্ভ হোৱাৰ পাছত ২০০৮ চনত ভূটানৰ প্রথম সংসদ প্রতিষ্ঠা হোৱাৰ সময়ত তেওঁ বিৰোধী দলৰ নেতা আছিল৷

লগতে পঢ়কঃ কৰ্তব্যত গাফিলতিৰ বাবে নিলম্বিত বঙাইগাঁওৰ বিদ্যালয়সমূহৰ পৰিদৰ্শক জ্যোৎস্না ৰাণী বৰ্মন

৫৮ বছৰীয়া শ্বেৰিং ট’বগে উচ্চ শিক্ষিত লোক। তেওঁৰ কেইবাটাও বিদেশী ডিগ্ৰী আছে। পিটচবাৰ্গ বিশ্ববিদ্যালয়ৰ পৰা মেকানিকেল ইঞ্জিনিয়াৰিঙৰ ডিগ্ৰী আৰু হাৰ্ভাৰ্ডৰ পৰা ৰাজহুৱা প্ৰশাসনৰ (পাব্লিক এডমিনিষ্ট্ৰেশ্যন) স্নাতকোত্তৰ ডিগ্ৰী লাভ কৰে। ইয়াৰ পূৰ্বে ২০১৩ চনৰ পৰা ২০১৮ চনলৈ তেওঁ প্ৰধানমন্ত্ৰী হিচাপে কাৰ্যনিৰ্বাহ কৰিছিল।

বিশ্ব বেংকৰ তথ্য অনুসৰি ভূটানত যুৱ নিবনুৱাৰ হাৰ ২৯ শতাংশ। যোৱা পাঁচ বছৰত অৰ্থনৈতিক বৃদ্ধিৰ গতি গড়ে ১.৭ শতাংশলৈ হ্ৰাস হৈছে, যিটো শ্বেৰিং ট’বগেৰ মতে অভূতপূৰ্ব অৰ্থনৈতিক প্ৰত্যাহ্বান আৰু ব্যাপক প্ৰব্ৰজনৰ বাবেই হৈছে।

লগতে পঢ়কঃ কেন্সাৰৰ চিকিৎসাত আশাৰ পোহৰ! আই আই টি কানপুৰৰ গৱেষকসকলে খুলিছে সম্ভাৱনাৰ নতুন দুৱাৰ

প্ৰতিবেদন অনুসৰি প্ৰতি আঠজন লোকৰ ভিতৰত এজনে খাদ্য আৰু অন্যান্য প্ৰয়োজনীয় সামগ্ৰীৰ মৌলিক প্ৰয়োজনীয়তা পূৰণৰ বাবে সংগ্ৰাম কৰি আছে। এই ক্ষেত্ৰত দেশখনক সঠিক দিশত লৈ যোৱাটো ট’বগেৰ বাবে এক ডাঙৰ প্ৰত্যাহ্বান।