অসমত ১২ জুলাইলৈ হ’ব ধাৰাসাৰ বৰষুণ

বানে সংহাৰী ৰুপ ধাৰণ কৰা অসমত ভূতৰ ওপৰত দানহ পৰাদি ১২ জুলাইলৈ হ’ব ধাৰাসাৰ বৰষুণ। কেন্দ্ৰীয় বতৰ বিজ্ঞান কেন্দ্ৰই এই তথ্য সদৰী কৰিছে।

বতৰ বিজ্ঞান কেন্দ্ৰই প্ৰকাশ কৰা তথ্য অনুসৰি ৯-১২ জুলাই পৰ্যন্ত অসম তথা উত্তৰ পূৰ্বাঞ্চলৰ লগতে পূব উত্তৰ ভাৰতৰ কেইবাখনো ৰাজ্যত প্ৰৱল বৰষুণ হ’ব।  এই দিন কেইটাত অসমত প্ৰতিদিনে প্ৰায় ২০ চেণ্টিমিটাৰকৈ বৰষুণ হোৱাৰ সম্ভাৱনা থকা বুলি বতৰ বিজ্ঞান কেন্দ্ৰৰ সূত্ৰই প্ৰকাশ কৰিছে।

বতৰ বিজ্ঞান কেন্দ্ৰই প্ৰকাশ কৰা মতে আৰৱ সাগৰৰ পৰা অহা প্ৰচুৰ জলীয় বাষ্প মিশ্ৰিত বতাহৰ প্ৰভাৱতে উত্তৰ ভাৰতৰ ৰাজ্য কেইখনত প্ৰৱল বৰষুণ হ’ব।

উত্তৰ পূৰ্বাঞ্চলৰ অৰুণাচল, মেঘালয়, ত্ৰিপুৰা,নাগালেণ্ড আদি ৰাজ্যৰ লগতে পঞ্জাৱ, হাৰিয়ানা,উত্তৰ প্ৰদেশ, বিহাৰ, পশ্চিম বংগ আদি ৰাজ্যতো ধাৰাসাৰ বৰষুণ হ’ব।

কেন্দ্ৰীয় জল আয়োগে বান বিধ্বস্ত ৰাজ্য অসমৰ বিভিন্ন জিলাক সেয়ে সতৰ্ক হৈ থকাৰ বাবে আগজাননী প্ৰকাশ কৰিছে।