উন্নয়নৰ স্বাৰ্থত বিজেপি প্ৰাৰ্থী হৰেন সিং বে’ক ভোট দিবলৈ আহ্বান মন্ত্ৰী হিমন্তৰ

কাৰ্বি আংলং জিলাৰ ডিফুত আজি পুৱাৰ ভাগত নিৰ্বাচনী প্ৰচাৰ চলায় বিজেপি নেতা তথা মন্ত্ৰী হিমন্ত বিশ্ব শৰ্মাই। প্ৰভাৱশালী মন্ত্ৰীগৰাকীয়ে স্বায়ত্ত শাসিত জিলা সমষ্টিৰ বিজেপি প্ৰাৰ্থী হৰেন সিং বে’ৰ হৈ প্ৰচাৰত অংশ লৈ কংগ্ৰেছক তীব্ৰ ভাষাৰে সমালোচনা কৰা দেখা যায়।

পাহাৰীয়া চহৰখনত আয়োজিত সভাখনত হাজাৰ হাজাৰ বিজেপিৰ সমৰ্থকৰ সন্মুখত মন্ত্ৰী শৰ্মাই হৰেন সিং বে’ এগৰাকী গতিশীল তথা শক্তিশালী প্ৰাৰ্থী বুলি মন্তব্য কৰে। লগতে অঞ্চলটোৰ উন্নয়নৰ স্বাৰ্থত বিজেপি প্ৰাৰ্থীগৰাকীক ভোট দিয়াৰ বাবে সকলোকে আহ্বান জনায়।

ভাষণ প্ৰসংগত তেওঁ অহা ৬ মাহৰ ভিতৰত ডিফু মেডিকেল কলেজ মুকলি কৰা হ’ব বুলি কয়। তদুপৰি সুলভ মূল্যৰ দোকানৰ জৰিয়তে ১৫ টকাতে ১ কেজি চেনি, কাৰ্বি আংলঙৰ স্বায়ত্তশাসিত আন্দোলনত চহিদ হোৱা প্ৰতিটো পৰিয়ালকে ৫ লাখ টকাকৈ আৰ্থিক সাহায্য প্ৰদান কৰিব বুলি উল্লেখ কৰে।

আনহাতে এইবাৰৰ লোকসভা নিৰ্বাচনত ৰাজ্যখনত বিজেপি মিত্ৰজোঁটে ১২ খন আসন পাব বুলি দাবী কৰে মন্ত্ৰী শৰ্মাই।

স্বায়ত্ত শাসিত জিলা সমষ্টিটোত বিজেপিৰ প্ৰাৰ্থীগৰাকীৰ বিৰুদ্ধে প্ৰত্যাহ্বান হিচাপে ঠিয় দিব কংগ্ৰেছ বিৰেণ সিং ইংতি। যোৱা ২০০৪ চনৰ পৰাই সমষ্টিটোক প্ৰতিনিধিত্ব কৰি আছে ইংতিয়ে।

উল্লেখ্য যে য়ুনাইটেড পিপলছ ডেম’ক্ৰেটিক চ’লিডেটেৰী (য়ু পি ডি এছ) সংগঠনৰ প্ৰাক্তন বিদ্ৰোহী নেতা হৰেন সিং বে’ বৰ্তমান কাৰ্বি আংলং স্বায়ত্ত শাসিত পৰিষদৰ কাৰ্যবাহী সদস্য।

স্বায়ত্ত শাসিত জিলা সমষ্টিত, যোৱা ১১ এপ্ৰিলৰ পৰা আৰম্ভ হোৱা সাধাৰণ নিৰ্বাচনৰ দ্বিতীয় পৰ্যায়ত অৰ্থাৎ ১৮ এপ্ৰিলত ভোটগ্ৰহণ অনুষ্ঠিত হ’ব। সমষ্টিটোত মুঠ ৫ গৰাকী প্ৰাৰ্থীয়ে প্ৰতিদ্বন্দিতা আগবঢ়াইছে।

উল্লেখ্য যে য়ুনাইটেড পিপলছ ডেম’ক্ৰেটিক চ’লিডেটেৰী (য়ু পি ডি এছ) সংগঠনৰ প্ৰাক্তন বিদ্ৰোহী নেতা হৰেন সিং বে’ বৰ্তমান কাৰ্বি আংলং স্বায়ত্ত শাসিত পৰিষদৰ কাৰ্যবাহী সদস্য।

স্বায়ত্ত শাসিত জিলা সমষ্টিত, যোৱা ১১ এপ্ৰিলৰ পৰা আৰম্ভ হোৱা সাধাৰণ নিৰ্বাচনৰ দ্বিতীয় পৰ্যায়ত অৰ্থাৎ ১৮ এপ্ৰিলত ভোটগ্ৰহণ অনুষ্ঠিত হ’ব। সমষ্টিটোত মুঠ ৫ গৰাকী প্ৰাৰ্থীয়ে প্ৰতিদ্বন্দিতা আগবঢ়াইছে।