এগৰাকী কিংবদন্তি ক্ৰিকেটাৰৰ মন্তব্য- ধোনীৰ সময় শেষ, সন্মান সহকাৰে হওক বিদায়
ভাৰতীয় দলৰ প্ৰাক্তন ক্ৰিকেটাৰ সুনীল গাভাস্কাৰে পুনৰ মহেন্দ্ৰ সিং ধোনী সন্দৰ্ভত কেইবাটাও গুৰুত্বপূৰ্ণ মন্তব্য কৰা পৰিলক্ষিত হৈছে।
ক্ৰিকেটত ধোনীৰ সময় শেষ হোৱা বুলি মন্তব্য কৰি গাভাস্কাৰে অতি শীঘ্ৰে বিকল্পৰ সন্ধান কৰিবলৈ টিম মেনেজমেণ্টক আহ্বান জনায়।
তেওঁ লগতে কয় যে ধোনীক সন্মান সহকাৰে বিদায় জনোৱাৰ সময় আহি পৰিছে। ধোনীৰ বিকল্প হিচাপে ঋষভ পন্টৰ কথা উল্লেখ কৰে মহান বেটছমেন গৰাকীয়ে।
ইফালে দীৰ্ঘদিন ধৰি ধোনীক লৈ চলি থকা অৱসৰ বিতৰ্ক সন্দৰ্ভত যোৱা শনিবাৰে গুৰুত্বপূৰ্ণ মন্তব্য কৰিছিল ভাৰতৰ অধিনায়ক বিৰাট কোহলীয়ে।
সকলো বিতৰ্ক একাষৰীয়া কৰি ভাৰতীয় অধিনায়ক গৰাকীয়ে ৩৮ বছৰীয়া মহেন্দ্ৰ সিং ধোনীৰ বিকল্প নাই বুলি মন্তব্য কৰিছিল।
কোহলীয়ে কৈছিল, ‘আপুনি লাগিলে মানক বা নামানক অনুভৱ সদায় কামত আহে। বয়স যে মাথো এটা সংখ্যা, সেইটো অতীতত বহু খেলুৱৈয়ে প্ৰমাণ কৰি থৈছে। এই কথাটো ধোনীয়েও বহুবাৰ প্ৰমাণ কৰিছে’।
‘তেওঁ সদায় ভাৰতীয় ক্ৰিকেটৰ কথাহে ভাবে। অৱসৰ কেতিয়া ল’ব লাগে সেয়া তেওঁৰ ব্যক্তিগত কথা। এই সন্দৰ্ভত বেলেগে নিজৰ মত ব্যক্ত কৰাটো ঠিক নহয়’। এইদৰে কৈছিল কোহলীয়ে।
উল্লেখ্য যে সদ্য সমাপ্ত বিশ্বকাপত ধোনীৰ প্ৰদৰ্শন খুব এটা সন্তোষজনক নাছিল। তেওঁৰ চিৰ পৰিচিত আক্ৰমণাত্মক বেটিঙৰ বিপৰীতে বিশ্বকাপৰ প্ৰত্যেকটো ইনিংছ আছিল অত্যন্ত মন্থৰ।
যাৰ বাবে কেইবা গৰাকীও প্ৰাক্তন ক্ৰিকেটাৰ তথা আলোচকে বিভিন্ন সংবাদ মাধ্যমৰ জৰিয়তে মহেন্দ্ৰ সিং ধোনীয়ে অৱসৰ গ্ৰহণ কৰিব লাগে তথা উপযুক্ত সময় বুলি মন্তব্য কৰি আহিছে।