পৰিয়ালৰ বাবে কিমান ধন-সম্পত্তি এৰি গ’ল মহাৰাষ্ট্ৰৰ উপ-মুখ্যমন্ত্ৰী অজিত পাৱাৰে?

মহাৰাষ্ট্ৰৰ ৰাজনীতিত এক শোকাকুল পৰিৱেশৰ সৃষ্টি কৰি এক বিমান দুৰ্ঘটনাত প্ৰাণ হেৰুৱালে ৰাজ্যখনৰ উপ-মুখ্যমন্ত্রী অজিত পাৱাৰে। জানিব পৰা মতে এটি লিয়েৰজেট ৪৫ মডেলৰ ভিটি-এছএছকে চাৰ্টাৰ্ড বিমানেৰে তেওঁ মুম্বাইৰ পৰা বাৰামতীলৈ গৈ আছিল। মুম্বাইৰ পৰা উৰা মৰা বম্বাৰ্ডিয়াৰ এৰোস্পেচ প্ৰতিষ্ঠানৰ এই বিমানখন বুধবাৰে পুৱা বাৰামতী বিমান বন্দৰত অৱতৰণ কৰাৰ সময়তে দুৰ্ঘটনাত পতিত হয় আৰু থিতাতে তেওঁৰ মৃত্যু ঘটে। এই খবৰ বিয়পি পৰাৰ লগে লগে সমগ্ৰ দেশৰ ৰাজনৈতিক মহলত শোকৰ ছাঁ পৰিছে। প্ৰধানমন্ত্ৰী নৰেন্দ্ৰ মোদীৰ লগতে দেশৰ বহু জ্যেষ্ঠ নেতা আৰু মন্ত্ৰীয়ে এই মৃত্যুত গভীৰ শোক প্ৰকাশ কৰিছে।

অজিত পাৱাৰে তেওঁৰ পাছত এৰি থৈ গৈছে কোটি কোটি টকাৰ সম্পত্তি। নিৰ্বাচন আয়োগৰ ওচৰত দাখিল কৰা শেহতীয়া শপতনামা অনুসৰি তেওঁৰ মুঠ সম্পত্তিৰ পৰিমাণ আছিল প্ৰায় ১২৪ কোটি টকা। ইয়াৰ বিপৰীতে তেওঁৰ ধাৰ আছিল প্ৰায় ২১ কোটি ৩৯ লাখ টকা। ধাৰসমূহ বাদ দিলে তেওঁৰ সম্পত্তিৰ নিট মূল্য আছিল প্ৰায় ১০৩ কোটি ১৬ লাখ টকা।

শেহতীয়া তথ্য অনুসৰি ২০২৪ চনৰ মহাৰাষ্ট্ৰ বিধানসভা নিৰ্বাচনৰ পাছত তেওঁৰ স্থাবৰ আৰু অস্থাবৰ সম্পত্তিৰ পৰিমাণ যথেষ্ট বৃদ্ধি পাইছিল। বিশেষকৈ বিগত পাঁচ বছৰত তেওঁৰ ঘোষিত সম্পত্তিৰ পৰিমাণ প্ৰায় ১০ কোটি টকা বাঢ়িছিল।

অজিত পাৱাৰৰ নামত মুঠ চাৰিটা বাসগৃহ আছিল যাৰ মূল্য কেইবা কোটি টকা। ইয়াৰ উপৰিও তেওঁৰ পত্নী তথা ৰাজ্যসভাৰ সাংসদ সুনেত্ৰা পাৱাৰৰ নামতো আছে ২২ কোটি টকা মূল্যৰ চাৰিটা ফ্লেট। এই দম্পতীয়ে কেইবাখনো কৃষিভূমি আৰু অকৃষি ভূমিৰ মালিক আছিল যাৰ সামূহিক বজাৰ মূল্য ৫০ কোটি টকাতকৈও অধিক।

ইয়াৰ বাহিৰেও পাৱাৰ পৰিয়ালৰ এটা ব্যৱসায়িক ভৱন আছে যাৰ আনুমানিক মূল্য প্ৰায় ১১ কোটি টকা। কেৱল অট্টালিকা বা মাটিয়েই নহয় অজিত পাৱাৰৰ সম্পদৰ তালিকাত ট্ৰেক্টৰ, ফিক্সড ডিপজিট, বিভিন্ন কোম্পানীৰ শ্বেয়াৰ আৰু বণ্ডও অন্তৰ্ভুক্ত আছিল।

আনহাতে তেওঁৰ পত্নী সুনেত্ৰা পাৱাৰৰ নামতো বৃহৎ পৰিমাণৰ সম্পত্তি আছিল। ২০২৪ চনৰ বিধানসভা নিৰ্বাচনৰ সময়ত তেওঁৰ স্থাবৰ সম্পত্তিৰ পৰিমাণ আছিল ১৪ কোটি ৫০ লাখ টকা আৰু অস্থাবৰ সম্পত্তি আছিল ৫৮ কোটি ৪০ লাখ টকা। অৱশ্যে এই বিপুল পৰিমাণৰ সম্পত্তিৰ মালিকীস্বত্বক লৈ আদালতত একাধিক গোচৰো চলি আছিল।