বন্ধ, প্ৰতিবাদৰ মাজতে কাইলৈৰ পৰা আৰম্ভ হ’ব উচ্চতৰ মাধ্যমিক শিক্ষান্ত পৰীক্ষা

ৰাজ্যখনত বিধেয়ক বিৰোধী প্ৰতিবাদ চলি থকাৰ লগতে জনজাতিকৰণৰ বিষয়কলৈ কেইবাটাও সংগঠনে বন্ধ-প্ৰতিবাদ অব্যাহত ৰাখিছে। ইয়াৰ মাজতে কাইলৈৰ পৰা আৰম্ভ হ’ব উচ্চতৰ মাধ্যমিক শিক্ষান্ত পৰীক্ষা। অহা ১৪ মাৰ্চলৈকে পৰীক্ষাসমূহ চলিব।

এইবাৰ ৰাজ্যখনত উচ্চতৰ মাধ্যমিক পৰীক্ষাত সৰ্বমুঠ ২,৪২,৮৪৩ গৰাকী পৰীক্ষাৰ্থী অৱতীৰ্ণ হ’ব। ৰাজ্যত মুঠতে ৭৮০ টা পৰীক্ষা কেন্দ্ৰত অনুষ্ঠিত হ’বলগীয়া পৰীক্ষাৰ কলা শাখাত ১,৮৬,২৯১গৰাকী, বিজ্ঞান শাখাত ৩৭,৪৫৫গৰাকী আৰু বাণিজ্য শাখাত ১৮,২৯১গৰাকীৰ লগতে বৃত্তিগত শাখাত ৯১০ গৰাকী পৰীক্ষাৰ্থী অৱতীৰ্ণ হ’ব।

আনহাতে, অহা ১৪ ফেব্ৰুৱাৰিৰ পৰা হাইস্কুল শিক্ষান্ত পৰীক্ষা আৰু হাই মাদ্ৰাছা পৰীক্ষাসমূহ অনুষ্ঠিত হ’ব। ৰাজ্যখনৰ মুঠ ৮৫৭ টা কেন্দ্ৰত অনুষ্ঠিত হ’বলগীয়া পৰীক্ষাত সৰ্বমুঠ ৩,৫২,১৪৩গৰাকী পৰীক্ষাৰ্থী অৱতীৰ্ণ হ’ব।

অসম মাধ্যমিক শিক্ষা পৰিষদে এইবাৰ পৰীক্ষাত দৃষ্টিহীন পৰীক্ষাৰ্থীসকলৰ বাবে ব্ৰেইলী পদ্ধতিৰ বিজ্ঞানৰ প্ৰশ্নকাকত আগবঢ়াব। তদুপৰি, বিশেষভাৱে সক্ষমসকলে অতিৰিক্ত এঘন্টা সময় লাভ কৰিব।

আনহাতে, পৰীক্ষা চলি থকা সময়ছোৱাত শিক্ষাৰ্থীৰ স্বাৰ্থত অসম বন্ধৰ আহ্বান নিদিবলৈ সংশ্লিষ্ট সকলো দল-সংগঠনলৈ মাধ্যমিক শিক্ষা পৰিষদে এক প্ৰেছ বিবৃতিযোগে আহ্বান জনাইছে।