ক’ভিড আতংকৰ মাজতে এটি সুখবৰ; উত্তৰ-পূৰ্বাঞ্চলৰ ডঃ দিব্যজ্যোতি শইকীয়ালৈ ৰাষ্ট্ৰীয় গৌৰৱ বঁটা

ডিজিটেল মাধ্যম জৰিয়তে উত্তৰ পূৰ্বাঞ্চল তথা অসমৰ ৰাষ্ট্ৰীয় পৰ্যায়ৰ মানৱ অধিকাৰ তথা সমাজ কৰ্ম্মী ড° দিব্যজ্যোতি শইকীয়াক সন্মানীয় “ৰাষ্ট্ৰীয় গৌৰৱ বঁটা”প্ৰদান আগবঢ়াইছে দেশৰ আগশাৰীৰ সন্মানীয় ৰাষ্ট্ৰীয় গৌৰৱ বঁটা সমিতিয়ে৷

সমগ্র ভাৰতবৰ্ষৰ ভিন্ন ক্ষেত্ৰত সফলতা লাভ কৰা বিভিন্ন ক্ষেত্ৰলৈ উৎকৃষ্ট সেৱা তথা অৱদান আগবঢ়োৱা বিশেষ দহজন ব্যক্তিক উক্ত সন্মানীয় বঁটা প্ৰদান কৰা হৈছে বুলি জানিব পৰা গৈছে ৷

সমাজসেৱা, শিক্ষা, স্বাস্থ্য আৰু উদ্যোগ আদি শিতানত উক্ত বঁটা প্ৰদান কৰা হয় ৷ ড° দিব্যজ্যোতি শইকীয়াই সমাজসেৱাৰ শিতানত এই বঁটা লাভ কৰিবলৈ সক্ষম হৈছে ৷

বহুকেইটা ৰাষ্ট্ৰীয় সংগঠনৰ মূৰব্বীৰ পদ অলংকৃত কৰা ড° দিব্যজ্যোতি শইকীয়া হ’ল অসম তথা উত্তৰ পূৰ্বাঞ্চলৰ পৰা এই বঁটা প্ৰাপ্ত একমাত্ৰ ব্যক্তি।

ড° শইকীয়াই সুদীৰ্ঘদিনৰে পৰা শান্তি, মানৱতা, মানৱ অধিকাৰ আৰু সামাজিক কাৰ্যৰে ৰাষ্ট্ৰ তথা মানৱ সমাজলৈ আগবঢ়াই অহা উৎকৃষ্ট সেৱাৰ বাবে ইতিমধ্যে প্ৰায় সত্তৰ তাতকৈও অধিক ৰাষ্ট্ৰীয় পৰ্যায়ৰ বঁটা আৰু দহৰো অধিক আন্তঃৰাষ্ট্ৰীয় পৰ্যায়ৰ বঁটা লাভ কৰিবলৈ সক্ষম হৈছে।

ইয়াৰ ভিতৰত আমেৰিকা যুক্তৰাষ্ট্ৰৰ বিশ্ব সংবিধান সংসদ সংস্থাৰ পৰা শ্রেষ্ঠ সমাজ সেৱাৰ বঁটা, মৌলানা আজাদ ৰাষ্ট্ৰীয় বঁটা, বাবু জগজীৱনৰাম ৰাষ্ট্ৰীয় বঁটা, ডঃ ভূপেন হাজৰিকা শান্তি বঁটা, চাকচেছ ইণ্ডিয়া এছিভাৰছ আইকন এৱাৰ্ড, ইন্টাৰনেশ্যনেল গান্ধী পিছ এৱাৰ্ড আদি উল্লেখযোগ্য।

“THE ASSAM WITCH HUNTING PPP ACT-2015” ৰ অৰ্থাৎ অসমত অন্ধবিশ্বাস বিৰোধী তথা ডাইনী কাণ্ড ৰোধৰ বাবে প্ৰণয়ন হোৱা আইনৰ প্ৰধান দাবীদাৰ ড° দিব্যজ্যোতি শইকীয়াৰ লগতে এইবেলি মহাৰাষ্ট্ৰৰ প্ৰখ্যাত সমাজকৰ্ম্মী পদ্মশ্ৰী ড° অম্বঋষ বিজয়কৰকেও উক্ত বঁটা(ৰাষ্ট্ৰ গৌৰৱ বঁটা) অৰ্জন কৰিছে ৷