আপুনি কিনিব পৰাকৈ আহি আছে ধোঁৱাহীন অত্যাধুনিক হাইড্ৰ’জেন গাড়ী

দক্ষিণ কোৰিয়া, জাপান, এমেৰিকাৰ দৰে নিৰ্বাচিত বজাৰত ইতিমধ্যে উপলব্ধ হাইদ্ৰ’জেন গাড়ীয়ে অহা এক, দুই বছৰৰ ভিতৰতে ভাৰতীয় বজাৰতো ভুমুকি মাৰিব।

ভাৰতত যোৱা ৯ জুলাইত ক’না নামৰ ইলেক্ত্ৰিক গাড়ীখন মুকলি কৰা ভাৰতৰ দ্বিতীয় বৃহৎ গাড়ী নিৰ্মাতা দক্ষিণ কোৰিয়ান প্ৰতিষ্ঠান হুন্দায়ে এই ক্ষেত্ৰত আগ্ৰহ দেখুৱাইছে।

কোম্পানিটোৰ শীৰ্ষ বিষয়াৰ উদ্ধৃতিৰে প্ৰকাশিত বাতৰি মতে, হুন্দাইৰ নেক্স’ হ’ব ভাৰতৰ বজাৰৰ প্ৰথম হাইদ্ৰ’জেন কাৰ, আৰু ইয়াক ২০২১ চনৰ ভিতৰত মুকলি কৰা হ’ব।

ভাৰতীয় বজাৰত মুকলি কৰিব লগা বাহনখনে এবাৰ ইন্ধন ভৰালে ১০০০ কিঃ মিঃলৈকে দূৰত্ব অতিক্ৰম কৰিব পাৰিব, কোম্পানিটোৰ শীৰ্ষ বিষয়াই জনায়।

কোম্পানিটোৰ গৃহদেশ দক্ষিণ কোৰিয়াত ইতিমধ্যে নেক্স’ নামৰ হাইদ্ৰ’জেন গাড়ীখন চলি আছে। হুন্দাইৰ উপৰি হোন্দা আৰু তয়’টাৰো হাইদ্ৰ’জেন গাড়ী আছে, কিন্তু তেওঁলোকে এতিয়াই এইক্ষেত্ৰত অধিক আগবঢ়াৰ কথা এতিয়ালৈকে কোৱা নাই।

বিকল্প ইন্ধনেৰে চালিত গাড়ীৰ ক্ষেত্ৰত নৰেন্দ্ৰ মোদীৰ দ্বিতীয়খন চৰকাৰে দেখুওৱা আগ্ৰহৰ ফলত এইধৰণৰ নতুন কাৰৰ ভাৰতত উপলব্ধ হোৱাৰ সম্ভাৱনা বৃদ্ধি পাইছে।

হাইদ্ৰ’জেন কাৰৰ ক্ষেত্ৰত ভাৰতত শেহতীয়াকৈ জি এছ টি ২৮ৰ পৰা ১২ শতাংশলৈ হ্ৰাস কৰা হৈছে।

হাইদ্ৰ’জেন গাড়ীও একধৰণৰ ইলেক্ত্ৰিক গাড়ীয়ে, কিন্তু ইয়াৰ ইন্ধন মিতব্যয়িতা পৰম্পৰাগত গাড়ীৰ সমপৰ্য্যায়ৰ বাবে বাণিজ্যিক সম্ভাৱনা বেছি বুলি একাংশই ধাৰণা কৰিছে।

এই হাইদ্ৰ’জেন গাড়ীবোৰক ফিউল চে’ল (fuel cell) গাড়ী ৰূপেও জনা যায়। ফিউল চে’লত হাইদ্ৰ’জেনৰ সৈতে অক্সিজেনৰ জাৰণ প্ৰক্ৰিয়াৰ (oxidation)দ্বাৰা মতৰ (motor) ঘূৰোৱা হয়।

সাধাৰণ দৃষ্টিত এইধৰণৰ গাড়ীক আটাইতকৈ পৰিস্কাৰ (cleanest) গাড়ী বোলা হয়। কাৰণ ইয়াৰ চলনত বৰ্জ্য পদাৰ্থৰূপে নিৰ্গত হয় কেৱল পানী আৰু তাপ (heat)|

কিন্তু ধোঁৱা ওলোৱা নলীৰ দৃশ্যমান প্ৰদূষণ নাথাকিলেও হাইদ্ৰ’জেন কাৰতো আছে আন এক দিশ।

তাপ পাৰিৱেশিক উষ্ণতা বৃদ্ধিৰ ক্ষেত্ৰত নিজেই এটা আপত্তিকৰ বস্তু, দ্বিতীয়তে হাইদ্ৰ’জেন ক’ৰ পৰা আহিব?

বৰ্তমান হাইদ্ৰ’জেনৰ উৎস প্ৰাকৃতিক গেছ। তথাপি, জৈৱিক ইন্ধনতকৈ হাইদ্ৰ’জেনচালিত গাড়ীয়ে প্ৰদূষণ ৩০ শতাংশ কমাব পাৰে বুলি এমেৰিকাত হোৱা শেহতীয়া এক গৱেষণাত প্ৰকাশ।