আমাৰ চৰকাৰ হ’লে চীনক ১৫ মিনিটত বাহিৰ কৰি দিলোহেতেন : ৰাহুল গান্ধী

সাধাৰণতে খুব ভদ্ৰ ভাষাৰে কেন্দ্ৰীয় চৰকাৰক সমালোচনা কৰা কংগ্ৰেছ নেতা ৰাহুল গান্ধীয়ে এইবাৰ প্ৰধান মন্ত্ৰী নৰেন্দ্ৰ মোদীৰ বিৰুদ্ধে যথেষ্ট আক্ৰামক ৰূপ ধাৰণ কৰা পৰিলক্ষিত হৈছে।

চীন-ভাৰতৰ সীমা কেন্দ্ৰিক বিবাদক লৈ ধাৰাবাহিকভাৱে কেন্দ্ৰীয় চৰকাৰক সমালোচনা কৰি অহা ৰাহুলে এইবাৰ মোদীক লক্ষ্য কৰি কয়, ‍‘এইজন কাপুৰুষে কয় যে আমাৰ ভূমি কোনেওদখল কৰা নাই। যদি আমাৰ চৰকাৰ হ’লহেতেন তেন্তে চীনক দাঙি বাহিৰ কৰি দিলোহেতেন’।

মিডিয়া ৰিপ’ৰ্টছৰ মতে ৰাহুলে কয়, ‍‘চাইনাৰ ইমান দম নাছিল যে সিহঁতে আমাৰ দেশত এক খোজো দিব। আজি বিশ্বৰ এখনেই দেশ আছে যাৰ ভূমি বেলেগ এখন দেশে দখল কৰিছে। আৰু প্ৰধান মন্ত্ৰীয়ে নিজকে দেশভক্ত বুলি কয়’।

হাৰিয়ানাত এক অনুষ্ঠানত অংশ লৈ ৰাহুলে লগতে কয়, ‍‘যদি আমাৰ চৰকাৰ থাকিলহেতেন তেন্তে চাইনাক ১৫ মিনিটৰ ভিতৰত দলিয়াই বাহিৰ কৰি দিলোহেতেন’।

উল্লেখ্য যে চীন-ভাৰতৰ সীমাক লৈ সংঘটিত হোৱা হিংসাত্মক ঘটনাৰ পিছৰে পৰা ৰাহুল গান্ধীয়ে নৰেন্দ্ৰ মোদী নেতৃত্বাধীন কেন্দ্ৰীয় চৰকাৰক সমালোচনা কৰি আহিছে।