খঙত ফাটি পৰিছিল ছোৱেইব আখটাৰ, ভয়ংকৰ ভাবুকি দিছিল এইজন ভাৰতীয় বেটছমেনক!

ক্ৰিকেট বিশ্বৰ বাঘা বাঘা বেটছমেনৰ বাবে এসময়ত ত্ৰাসৰ কেন্দ্ৰবিন্দু আছিল পাকিস্তানৰ দ্ৰুতবেগী বলাৰ শ্বোৱেইব আখটাৰ।

তীব্ৰ বেগত কৰা বলৰ উপৰিও শাৰিৰীক অংগী ভংগীৰেও বেটছমেনক আতংকিত কৰি তোলাত সিদ্ধহস্ত আছিল ‘ৰাৱালপিণ্ডি এক্সপ্ৰেছ’খ্যাত তাৰকাজন।

উত্তেজনাবসতঃ আনকি বেটছমেনক মুখেৰেও তেওঁ ভাবুকি প্ৰদান কৰিছিল।

এই সন্দৰ্ভত টীম ইণ্ডিয়াৰ প্ৰাক্তন তাৰকা ৰবিন উথাপ্পাই শেহতীয়াকৈ মুখ খুলিছে।

উথাপ্পাই জনোৱামতে, ২০০৭ চনৰ এটা এদিনীয়া শৃংখলাৰ গোৱালিয়ৰত অনুষ্ঠিত চতুৰ্থখন মেচৰ প্ৰাকক্ষণত খোৱাৰ টেবুলত আখটাৰৰ স’তে তেওঁৰ দেখা হৈছিল।

“মনত আছে যে সকলোৱে মিলি খোৱা-বোৱা কৰিছো। শ্বোৱেইব ভাইও তাত আছিল। মোৰ কাষলৈ আহি তেওঁ ক’লে- ‘প্ৰথম মেচে ভাল খেলিছ’।”- উথাপ্পাই কৈ যায়।

উথাপ্পাই কয় যে তাৰপাছতে আখটাৰে তেওঁক ক’লে- “এটা কথা মনত ৰাখিবি। আগৰ মেচখনত মোৰ বল আগবাঢ়ি আহি মাৰিছিলি। যদি পুনৰ সেই ৰকম খেল, তেনেহ’লে মইও নাজানো কি হ’ব পাৰে। হয়তো তোৰ মূৰলৈ লক্ষ্য কৰি বিমাৰ উৰি আহিব পাৰে।”

কিয় ইমান খং উঠিছিল আখটাৰৰ?

সেই কথাও জনালে উথাপ্পাই।

“গুৱাহাটীত অনুষ্ঠিত শৃংখলাৰ প্ৰথমখন মেচত শ্বোৱেইবে যেতিয়া বল কৰিছিল, তেতিয়া মই আৰু ইৰফান পাঠান ক্ৰিজত আছিলো। ২৫টা বলত ১২ ৰান দৰকাৰ আছিল জিকিবৰ বাবে। মনত আছে, শ্বোৱেইবে মোক য়ৰ্কাৰ দিছিল। শেষ মুহূৰ্তত বলৰ ধৰণ বুজিব পাৰি মাৰি পঠাও। পাছৰ বলটো তলেৰে ফুল টছ আছিল আৰু সেইটো বাউণ্ডেৰী মাৰো।”- উথাপ্পাই কয়।

“তেতিয়া নিজেই ঠিক কৰিছিলো যে শ্বোৱেইবক পিটাৰ সুযোগ বাৰে বাৰে নাহিব। এতিয়া সেইটো কামত লগাব লাগিব। পাছৰ বলত আৰু এটা চাৰি মাৰিছিলো। মেচখনত আমি জিকিছিলো।”- উথাপ্পাই কয়।